FERROL, 11 Abr. (EUROPA PRESS) -
O Concello de Ferrol e a Universidade da Coruña asinaron hoxe tres convenios de colaboración polos que a administración local destina 19.000 euros para financiar varios proxectos de investigación e a organización de xornadas sobre filosofía no campus ferrolano.
A sinatura correu a cargo do concelleiro delegado de Cultura-Campus, Leopoldo Ibáñez, e do vicerrector da Universidade en Ferrol, Luis Fernando Barral Losada.
O primeiro dos convenios de colaboración céntrase no proxecto cultural e de investigación 'Aula no camiño: diálogos galego-portugueses nun camiño de identidades', dirixido a afondar no estudio da realidade galega e europea das zonas que cruza o Camiño de Santiago.
O profesor Xosé Leira López dirixe unha iniciativa que conta coa colaboración de 14 profesores e conferencias de distintas universidade e institucións, ademais de 20 alumnos da Facultade de Humanidades. O concello destina a esta investigación 9.000 euros.
Ao segundo convenio o Goberno local destina 6.000 euros. Trátase do primeiro proxecto de investigación arqueolóxica organizada por unha universidade galega en Oriente Próximo. O seu obxectivo é a localización dunha cidade do século XIX a.C., no Val do Éufrates, en Siria. É a terceira campaña desta misión arqueolóxica e desenvolverase entre o 18 de agosto e o 18 de setembro, dirixida polo profesor de Historia Antiga Juan Luis Montero Fenollós.
O último acordo recolle unha partida de 4.000 euros, en concepto de patrocinio das 'XII Xornadas sobre Filosofía e Metodoloxía Actual da Ciencia: xornadas sobre observación e experimentación en ciencia, novas perspectivas metodolóxicas' que se celebraron no Campus de Ferrol, os pasados 8 e 9 de marzo, coordinadas polo profesor Wenceslao J. González.
O concelleiro de Cultura-Campus de Ferrol, Leopoldo Ibáñez, resaltou que se está a traballar na potenciación da Universidade ferrolana a través da implantación dun bonobús entre a cidade e A Coruña.
Pola súa banda, o vicerrector do Campus de Ferrol, Luis Barral, agradeceu a colaboración prestada polo Concello para unhas áreas "para as que ás veces resulta difícil atopar apoio e financiamento".
