VIGO, 10 Oct. (EUROPA PRESS) -

A Consellería de Innovación e Industria e o Clúster de la Automoción de Galicia investirán este ano un total de 131.552 euros, dos que a metade serán achegadas polo departamento autonómico, en actividades de fomento da innovación, o coñecemento e a competitividade do sector.

Así, o responsable autonómico de Industria, Fernando Blanco, e o presidente do Clúster de la Automoción de Galicia, Antonio Vega, asinaron hoxe un convenio de colaboración no que se inclúe a execución dun plan de mellora da competitividade do tecido da automoción galega e se estudarán especificamente as necesidades de chan e equipamento industrial do sector.

Neste senso, este estudio de necesidades de solo e equipamento industrial contribuirán á instalación das novas empresas do sector para combater a deslocalización e potenciar que as compañías se instalen na comunidade e non no norte de Portugal.

Este documento identificará as necesidades reais de espazo que ten o sector, aínda que tamén incluirá unha análise dos equipamentos, niveis de seguridade e competitividade do chan e os accesos a redes viarias, tanto nos polígonos actuais coma nos proxectados para o horizonte de 2011.

Ademais, co obxectivo de mellorar a competitividade do sector, o convenio contempla a posta en marcha dunha nova ferramenta de diagnóstico que se aplicará en 8 pequenas empresas. A aplicación, baseada no denominado 'benchmarking' analizará o seu nivel competitivo e permitirá ás pymes poñer en marcha produtos de mellora baseados no ''lean manufacturing''.

XESTIÓN de I+D+I.

Por outra banda, Blanco asinou hoxe outro convenio de colaboración co Club Financeiro de Vigo, a Fundación Empresa Universidade de Galicia (FEUGA) e o Instituto Tecnolóxico de Galicia (ITG) polo que a consellería destinará 226.000 euros ao desenvolvemento de actividades de formación no ámbito da I+D+I.

O acordo, enmárcase no programa 'Aula de Investigación e Innovación' inclúe unha serie de conferencias, cursos e seminarios que apoien a formación no ámbito da xestión da I+D+I co fin de capacitar os xestores galegos de modo que se convertan en axentes de innovación.

As actividades a realizar orientaranse cara aos campos da xestión da I+D+I; xestión da innovación na empresa; habilidades directivas e xenéricas para xestores de innovación; e cuestións de actualidade en innovación.

O programa está coordinado pola consellería, que financiará a totalidade das actividades, mentres que o resto de institucións asinantes do convenio serán as responsables da organización das actividades fixadas no convenio de hoxe.

Así, ademais de Blanco, no acto de rúbrica do documento tamén participaron o director do Club Financeiro, Jesús Bahíllo, o director xeral de FEUGA, Javier López, e o vicesecretario de ITG, José Manuel Hermida-Cachalvite.