As novas instalacións contan con dúas plantas e un total de nove niños dende os que se poderán dirixir os proxectos

OURENSE, 4 May. (EUROPA PRESS) -

A cidade de Ourense conta dende hoxe cunhas instalacións dende as que novos emprendedores do mundo empresarial poderán poñer en marcha proxectos para revitalizar o casco histórico da capital das Burgas. Trátase do Centro de Iniciativas Empresariais, situado na Praza Saco e Pradairo da capital ourensana, que foi inaugurado polo alcalde da cidade, Enrique Nóvoa.

As instalacións atópanse en tres edificios que foron rehabilitados polo concello a través do Plan Urban II, cunha inversión de dous millóns de euros. O Centro de Iniciativas Empresariais conta cun total de nove niños, dende onde os emprendedores poderán dirixir os seus proxectos e, para iso, o concello convocará un concurso para que os interesados presenten as súas propostas e poidan ocupar os devanditos niños.

O concelleiro de Formación Ocupacional, Francisco Javier Rodríguez Nóvoa, manifestou a súa "satisfacción" pola contribución das novas instalacións á posta en marcha deste tipo de proxectos, que irán destinados a "dinamizar" o casco histórico de Ourense.

PROXECTO COMPLEXO

As fachadas dos edificios rehabilitados presentan nova carpintaría, aínda que se mantén a pedra orixinal. Nas súas dúas plantas e o ático, acolle outros servizos complementarios como unha biblioteca, sala de reunións e salón de actos, entre outros.

Pola súa banda, o director da oficina do PERI, César Pichel, asegurou que o proxecto arquitectónico é "un dos máis complexos" que se realizaron na zona, xa que mantén a "identidade" das edificacións e, por iso, sinalou que espera que "sirva de exemplo para futuras rehabilitacións".

Neste sentido, César Pichel manifestou que a rehabilitación destes edificios que acollen o Centro de Iniciativas Empresariais marcarán "un antes e un despois" dos proxectos arquitectónicos elaborados na cidade de Ourense, posto que supón un "exemplo de boa arquitectura".

"VAI POR BO CAMIÑO"

Na súa intervención, o alcalde de Ourense asegurou que as novas instalacións darán "vida" aos novos emprendedores e asegurou que o Concello de Ourense "vai por bo camiño", porque os edificios eran un "enfermo terminal que foi recuperado".

O inmoble tamén será utilizado para albergar algunhas obras artísticas que o depósito do Concello de Ourense posúe e que non tiñan espazo noutros edificios de titularidade municipal.