SANTIAGO DE COMPOSTELA 30 Mar. (EUROPA PRESS) -

A Real Academia Galega de Ciencias (RAGC) dedicará o Día do Científico Galego deste ano á figura do enxeñeiro agrónomo Cruz Gallástegui, un dos "pioneiros" na "modernización da agricultura galega", a partir da experimentación con híbridos de millo e "a súa dedicación plena á posta en marcha e consolidación" á Misión Biolóxica de Galicia.

En rolda de prensa, o presidente da RAGC, Ernesto Viéitez, destacou que este recoñecemento se concede aos "exemplos máis destacados do pasado" no ámbito científico, para que a opinión pública "poida percibir" o "prestixio actual da investigación en Galicia" e a "necesidade de inverter recursos nela para que o seu potencial sexa cada vez maior de cara ao futuro".

Por iso e coincidindo co aniversario da publicación no DOG da constitución da Academia en 1977, o próximo 22 de abril dedicarase á figura de Gallástegui, co obxectivo de consolidar dita data "como unha celebración de toda a sociedade" e "ao mesmo nivel que o Día das Letras Galegas".

Segundo destacou o investigador e xefe de departamento na Misión Biolóxica de Galicia, Armando Ordás, o homenaxeado foi "pioneiro" tamén en materia de transferencia de coñecementos e do progreso científico ao sector produtivo, ademais de fundador dun sindicato de produtores para "dar saída" ás súas propostas.

Ordás asegurou que foi "un dos introdutores da xenética en España", tras coñecer de primeira man os devanditos avances durante a súa estanza en Estados Unidos. A pesar diso, o seu principal recoñecemento foi diagnosticar os "principais problemas do campo galego" e enfocar as súas investigacións cara á súa "mellora".

VASCO DE NACEMENTO

O enxeñeiro agrónomo Cruz Gallástegui Unamuno, nacido en Bergara en 1891, está recoñecido como "o pai da modernización" agrícola en Galicia. Graduado na Real Escola Superior de Agricultura de Hohenheim, dirixiu a súa primeira granxa experimental en Lugo e ampliou os seus estudios de Medicina no Rockefeller Institute de Nova York para despois trasladarse a Manhattan en 1917 grazas a unha bolsa.

Tras realizar numerosas viaxes de estudios en Dinamarca, Noruega ou Suecia, decidiu participar a partir de 1921 na creación da Misión Biolóxica de Galicia, con sede en Santiago --o actual Parlamento de Galicia-- e as principais áreas de traballo do cal se centraron na experimentación do millo, mellora produtiva e a busca de solucións aos problemas do castiñeiro.

Tras casarse en 1924 e trasladarse a Pontevedra tres anos despois, participou, entre outras investigacións, na mellora da baixa produtividade das patacas a través do seu traballo no Sindicato de Produtores de Sementes.