SANTIAGO DE COMPOSTELA 12 Jul. (EUROPA PRESS) -

Destacadas empresas da industria agroalimentaria galega manterán o próximo martes, 17 de xullo, en Santiago de Compostela, un encontro de traballo para analizar os principais proxectos que se presentarán ao Plan Nacional de I+D+i 2008-2011 e ao Programa Marco de I+D da Unión Europea, que destinará máis de 300 millóns a este sector para potenciar o seu desenvolvemento tecnolóxico.

O encontro, impulsado pola Plataforma Tecnolóxica Española de Alimentación 'Food For Life Spain', e ao que o precederon outros en diferentes cidades españolas, pretende estimular a presentación de proxectos de I+D na industria agroalimentaria galega.

Están invitadas firmas procedentes de sectores tan diversos como o de cárnicos, pescados, conservas, lácteo, restauración e pratos preparados, entre outros, para debater sobre as liñas temáticas nas que traballar identificando futuros proxectos de investigación.

Organizada pola Federación Española de Industrias de Alimentación e Bebidas (FIAB) e o Centro Tecnolóxico de Alimentación AINIA, esta reunión forma parte das accións impulsadas pola Plataforma Española de Alimentación 'Food For Life Spain' para potenciar a competitividade das empresas deste sector, que demostra interese por avanzar na innovación enfocada ao mercado e ao consumidor e que inverte o 0,26% do total da súa facturación a este área.