SANTIAGO DE COMPOSTELA 22 Jun. (EUROPA PRESS) -

Un total de 13 pequenas e medianas empresas (pymes) galegas contactarán con posibles socios internacionais para tomar parte en proxectos de fomento da innovación, como os programas de cooperación tecnolóxica internacional, o Eureka ou o Iberoeka.

O director do Instituto Galego de Promoción Económica (Igape), Joaquín Varela, o director de BIC Galicia, Enrique Vila, e o subdirector de Xestión de Proxectos do Igape, Norberto Penedo, presentaron hoxe o proxecto de Cooperación para a Innovación Empresarial Internacional, que busca fomentar as relacións entre empresas galegas con centros tecnolóxicos e outras sociedades innovadoras europeas.

A primeira fase do programa, a análise das capacidades das pymes galegas e a elaboración do correspondente informe técnico, está xa finalizada, segundo apuntou Vila, quen explicou que o segundo paso consistirá na busca de socios internacionais.

Para iso, explicou, procederase á difusión dos perfís das empresas galegas que participan na iniciativa, de modo que os informes serán remitidos a centros tecnolóxicos, empresas e universidades; ao tempo que se promoverá a participación en eventos nos que se poidan establecer contactos con outras empresas.

O director do Igape indicou que deste modo se fomenta o acceso destas pequenas e medianas empresas a programas internacionais ao que, de forma individual, "non "poden acceder". O presuposto total é de máis de 200.000 euros.

Pola súa banda, o responsable de xestión de proxectos do instituto sinalou que este proxecto, que recibe fondos da Xunta e estatais, forma parte dunha iniciativa do Ministerio de Industria que ten descentralizada a súa xestión.

Agregou que máis de 3.400 empresas galegas participaron en iniciativas do programa Innoempresa nos dous últimos anos, a través de 960 proxectos. Na primeira convocatoria realizada en 2009 rexistráronse 654 solicitudes que se atopan "en proceso de avaliación".