SANTIAGO DE COMPOSTELA, 19 Jul. (EUROPA PRESS) -

Invantia Research, unha empresa de Ourense dedicada á investigación no sector agroalimentario, prepara a comercialización dun cortalumes natural a base de oliveiras e outras especies, que espera que poida contribuír á mellora ambiental e á diminución dos incendios forestais en Galicia.

A eficacia deste sistema baséase nas propias características da oliveira, unha árbore que pode alcanzar ata 15 metros de altura e que "retén moita auga, polo que é moi útil para esta tarefa", explicou a directora xeral de Invantia, María Estévez, en declaracións a Europa Press.

O obxectivo é realizar plantacións deste tipo en zonas con alto índice de risco de incendio das catro provincias galegas, algo para o que, segundo asegurou, xa recibiron o interese da Administración galega, de Comunidades de Montes e "mesmo de empresas privadas situadas en zonas perigosas".

"Intentamos reimplantar a oliveira en Galicia, e unha das aplicacións directas e novidosas é o tema ambiental", destacou Estévez, tras o que detallou o estado da evolución dos traballos. En primeiro lugar, indicou, centráronse na execución e desenvolvemento do cortalumes a través dun software que crearon especificamente para a investigación.

"MAPA DE RISCOS"

Esta primeira etapa, que desenvolveron en colaboración coa Universidade de Santiago de Compostela (USC) --concretamente, co Grupo Terby Promat--, buscaba ver como respondía o cortalumes na simulación por ordenador. Os resultados foron positivos e "xa esta finalizada", apuntou en declaracións a Europa Press.

Agora inician a segunda fase, na que crearán un "mapa de riscos" mediante a recompilación de información sobre a xeografía dos montes galegos. Con isto, pretenden avaliar "en qué zonas vai funcionar mellor" o cortalumes, que Estévez definiu como "unha barreira natural" ou "un camiño trazado a partir das árbores".

A idea é "finalizar a investigación o ano que vén e empezar a comercializala", dixo a responsable de Invantia, que destacou que o produto final será "rendible e se adaptará ao mercado". Segundo asegurou, existe "interese" entre as Comunidades de Montes, a Administración ou "mesmo entre empresas privadas en zonas de risco de incendio".

Invantia, que recibiu unha axuda do Ministerio de Ciencia e Innovación, conta cunha plantación produtiva e outra experimental no Parque Tecnolóxico de Galicia. "A oliveira dáse moi ben aquí, tanto a nivel de crecemento da planta, coma para a composición do aceite e o froito", recalcou Estévez.

BIOMASA

Ademais, incidiu en que "a novidade" é que esta especie non se utilizaba na comunidade "nin en agricultura nin para novas aplicacións", entre as que se referiu, tamén, ao aproveitamento de biomasa. Noutra liña, a empresa traballa na obtención dun aceite de oliva virxe con denominación de orixe propia.

O seu equipo está formado por licenciados en Enxeñaría Agrónoma, Bioloxía, Química, Tecnoloxía dos Alimentos e Enxeñaría Química, con experiencia investigadora tanto en centros públicos de investigación coma en empresas privadas.