SANTIAGO DE COMPOSTELA 2 May. (EUROPA PRESS) -

A Axencia Galega de Emerxencias (Axega) pon en marcha un proxecto pioneiro en España de xestión de emerxencias por tecnoloxía móbil que se vai implantar, en fase de probas, nos 18 parques de bombeiros pertencentes aos diferentes consorcios que operan en Galicia.

Este proxecto denominado 'EGA-Móbil' ('Emerxencias Galicia móbil') permite a conectividade permanente do centro de atención do 112 de Galicia cos distintos grupos de intervención dende o propio lugar do sinistro.

Neste sentido, permitirá aos efectivos de emerxencias enviar anotacións, imaxes e documentos ao 112 así como á inversa. A través dunhas PDA especiais, que irán situadas nos propios vehículos, poderase mellorar a calidade da información que facilitará a toma de decisións en tempo real en ambos os dous lugares.

As funcionalidades máis destacadas deste innovador sistema son o acceso á información das incidencias activas do operador remoto de conexión ao centro de emerxencias, a recepción de avisos xeneralizados, a xestión de mensaxes de estatus e a asociación de fotografías ao incidente.

Así mesmo, outra das principais vantaxes deste sistema é a xestión GPS, xa que facendo uso do TomTom Navigator se obtén a información de posicionamento, que permitirá operacións como a creación automática de ruta ata a situación do accidente, a substitución da situación xeográfica do incidente pola localización actual do dispositivo e o control das diferentes flotas.

O pasado 29 de abril tivo lugar unha xornada técnica de presentación do proxecto, á cal asistiron 50 mandos de bombeiros de parques da provincia de A Coruña, mentres que o próximo 6 de maio se realizará unha nova toma de contacto con profesionais das provincias de Pontevedra e Ourense.