O Arcebispado de Santiago valora a rectificación dun párroco de Zas dunhas expresións "inapropiadas"

   SANTIAGO DE COMPOSTELA, 17 Dic. (EUROPA PRESS) -

   O Arcebispado de Santiago valorou "positivamente" as puntualizacións realizadas polo presbítero de Zas (A Coruña) Francisco Rafael Gómez-Canoura, en relación cunhas manifestacións "inapropiadas e desafortunadas" realizadas por el mesmo na súa conta de Twitter.

   "Desde o Arcebispado apréciase esta rectificación, pois como el mesmo explicou as expresións eran inapropiadas e desafortunadas", subliñou esta institución eclesiástica nun comunicado de prensa.

   Neste sentido, o arcebispado de Santiago reiterou o seu "compromiso pola igual dignidade entre homes e mulleres" e o seu "rexeitamento a todo tipo de violencia".

BORRADO

   En concreto, o párroco de varias parroquias do municipio coruñés de Zas (A Coruña), Franciso Rafael Gómez-Canoura, chamou "manada de porcas" ás feministas na súa conta de Twitter nunha mensaxe que foi borrado pero cuxas capturas circulan polas redes sociais. Ademais, tamén cualificou de "imbécil" aos votantes do BNG despois de que o deputado nacionalista Néstor Rego non participase na rolda de consultas do rei Felipe VI.

   Este martes, após o borrado de todas as mensaxes publicadas até a data, o sacerdote indicou nun tuit que decidiu empezar "de cero esta nova conta, xa que algunhas cousas foron mal".

   Precisamente, preguntado por Europa Press sobre as súas palabras, o párroco pediu "desculpas" aos aludidos e remitiuse a outro tuit no que asegura que a reacción foi "en quente" e cualifica a súa publicación de "inapropiada e desafortunada".