A auxiliar do naval Gabadi, de Narón (A Coruña), presenta un ERE extintivo para 36 traballadores

   FERROL, 9 Mar. (EUROPA PRESS) -

   A empresa Gabadi, auxiliar do sector naval con sede no polígono industrial de Río do Pozo, en Narón (A Coruña), presentou un expediente de regulación de emprego (ERE) extintivo para 36 dos seus traballadores, alegando causas produtivas e organizativas.

   Trátase dunha empresa especializada na habilitación de buques, ademais de na realización de tanques de membrana de gas natural licuado (GNL) para embarcacións.

   Segundo a representación sindical, a intención da dirección de Gabadi pasa por despedir a estes traballadores con contrato indefinido, pero está medida non está xustificada, tal e como denuncia.

   E é que na actualidade, aseguran os delegados sindicais, a empresa conta no seu cadro con máis de 50 empregados eventuais que realizan prolongacións de xornada, ademais de que subcontrata traballos a outras compañías.

   A CIG, organización maioritaria con cinco representantes no comité --fronte aos catro de UXT--, denuncia que "non é a primeira vez que a empresa presenta un despedimento colectivo e, curiosamente, moitos dos traballadores foron contratados inmediatamente por outra empresa da mesma propiedade".

   Tras a presentación da documentación, as negociacións entre dirección e representantes sindicais prolongaranse durante os próximos 30 días, unha vez quedou constituída a mesa.