O BNG denuncia unha "alerta epidemiolóxica" en Salvaterra de Miño (Pontevedra) por "beber auga da traída"

VIGO, 28 Dic. (EUROPA PRESS) -

O Bloque Nacionalista Galego (BNG) denunciou este mércores unha "alerta epidemiolóxica" na localidade pontevedresa de Salvaterra de Miño por "beber auga da traída".

Segundo informou a formación nacionalista nun comunicado, este sábado, 24 de decembro, tívose coñecemento, a través de varias canles, dun "importante número de persoas" de Salvaterra de Miño afectadas por gastroenterite que foron atendidas no PAC de Ponteareas (Pontevedra).

Tal e como sinalou o BNG, as primeiras informacións "apuntan a que un dos focos atópase no colexio Infante Felipe" e que "podería ter relación co feito de beber auga da traída", un servizo xestionado polo Concello de Salvaterra de Miño.

Por iso, o BNG comunicou este luns, 26 de decembro, aos veciños da existencia dunha "alerta epidemiolóxica" que, segundo asegurou a propia formación nun comunicado, "foi confirmada directamente pola xerencia do Sergas", aínda que tamén declararon que "non hai nada concluínte".

Agora, o partido nacionalista solicitou información ao goberno local, que "negou as denuncias nas redes sociais sen facer ningún tipo de recomendación aos veciños". "É unha actitude irresponsable ante un problema de saúde pública", criticaron desde o BNG.

Así mesmo, a formación nacionalista solicitou ao Concello de Salvaterra de Miño as análises de auga do mes de decembro para comprobar a potabilidade da auga, algo que tamén fixo a formación nacionalista de forma independente.

"NON HOUBO ALERTA SANITARIA"

Pola súa banda, a alcaldesa de Salvaterra de Miño, Marta Valcárcel, asegurou a Europa Press que "sí se produciu un incremento de casos de gastroenterites" pero que "aínda se descoñecen as causas".

"Estamos a traballar para tentar localizar a orixe destes casos. Mantemos contactos cos veciños e Sanidade", declarou Valcárcel.

Así mesmo, fontes de Sanidade consultadas por Europa Press sinalaron que "non houbo alerta sanitaria". "Iso dítao a dirección xeral de Saúde Pública, que é a que se encarga de facer as analíticas nun laboratorio acreditado", sinalaron as mesmas fontes.