O BNG insiste en que o Pacto pola lingua é "un paso atrás" e lamenta: "É un pacto do PP co PP"

   SANTIAGO DE COMPOSTELA, 16 Jul. (EUROPA PRESS) -

   A portavoz de Lingua do BNG, Mercedes Queixas, insistiu en que a proposta de actualización do Plan Xeral de Normalización Lingüística de 2004 presentada este mércores pola Xunta supón "un paso atrás" e lamentou que se trata dun pacto "do PP co PP".

   Nunha rolda de prensa este xoves, a nacionalista sinalou que o documento "reduce a protección" para o galego existente no actual plan. En concreto, Queixas detallou que o Plan de Normalización en vigor "fixa un 50% como mínimo de educación" en lingua galega e a proposta presentada "elimina esa protección".

   Ademais, tachou o plan "dun paripé propagandístico" do Partido Popular para "tentar tapar 17 anos de políticas continuadas en contra do galego". "Estamos ante un pacto do PP co PP", reprochou.

   Nesta mesma liña, reiterou que se manteña "o decreto da vergoña", en alusión ao decreto do plurinlingüismo, que, subliñou, "colocou o galego na peor situación da súa historia, tanto en coñecemento e en competencia como en uso".

   "O Goberno de Rueda está a lograr o que non foi capaz de conseguir o franquismo, converter o galego nunha lingua residual e roubar ás futuras xeracións o dereito de coñecer o galego para ter a liberdade de poder usalo", espetou antes de censurar que se camiñe "cara ao monolingüismo".

AUSENCIA DE ALFONSO RUEDA

   Ademais, Queixas fixo mención á "gran ausencia" do presidente da Xunta, Alfonso Rueda, no acto celebrado na xornada do mércores na Cidade da Cultura.

   "Impórtalle tan pouco a lingua e o futuro deste país que xa nin se molesta en disimulalo. Preferiu marcar distancias coa situación da lingua, escolleu ir asinar un convenio para humanizar unha rúa", manifestou Queixas, que ironizou coa "coherencia" de Rueda na súa "persistencia en contra do galego".

PROPOSTAS

   Así mesmo, Mercedes Queixas puxo en valor as propostas do BNG para "reverter" esta situación, comezando pola derrogación do "decreto da vergoña" e seguindo polo cumprimento do Plan Xeral actual.

   "Non pode ser que en 2026, e cunha situación sociolingüística moito peor, o PP propoña facer menos e actuar en contra desta situación", remarcou.

REUNIÓNS PROPOSTAS POLO PP

   Doutra banda, preguntada polas reunións con todos os grupos propostas polo PPdeG na Cámara, a deputada do Bloque destacou que o Goberno autonómico "leva dous anos sen tomar nin unha soa medida a favor do galego" e "demorando a entrada deste documento".

   Así, volveu a insistir en que se Rueda quixese "cambiar o decreto da vergoña podería facelo xa", pero "non quere". Por este mesmo motivo, criticou que non aparezan recollidas no documento "as propostas das comisións" que, sinalou, "foron vetadas polo PP".

   "Resulta curioso que as persoas expertas que participaron empecen a transmitir a idea de que o PP vetou as súas propostas. É un pacto do PP co PP, que ignora as propostas das comisións de expertos que a Xunta nomeou", resolveu.