O BNG levará ao Congreso en outubro unha proposición de lei para reducir a xornada laboral a 35 horas

SANTIAGO DE COMPOSTELA 15 Sep. (EUROPA PRESS) -

O BNG anunciou que levará ao pleno do Congreso en outubro unha proposición de lei "ambiciosa e valente" para reducir a xornada laboral até as 35 horas, despois de que a semana pasada non saíse adiante a proposta de baixala a 37,5 horas.

Nun comunicado, o deputado nacionalista, Néstor Rego, lembrou que o Bloque rexistrou esta iniciativa co impulso da CIG para "conquistar dereitos para os traballadores fronte á explotación".

"O futuro pasa polas 35 horas e avanzar cara á xornada de 32 horas en 4 días semana", subliñou Rego.

A intención desta proposta é avanzar cara a unha distribución "máis xusta" do traballo, garantir a conciliación da vida laboral e persoal e aumentar a produtividade sen reducir os salarios, segundo indica o BNG.

Por todo isto, o Bloque chamou ao resto de forzas políticas a ser "valentes" e a tomar en consideración esta medida, que vai máis aló da proposta do Goberno.

"A xornada de 37,5 horas xa é xeral na Administración pública (en moitos sectores mesmo 35) e en moitas empresas. Agora é necesario avanzar para as 35", reivindicou Rego.

Para el, esta medida suporía un avance social "innegable" e contempla "garantías" para evitar o abuso de horas extras e melloras a regulación do rexistro de xornada, engadiu.