O BNG propón un fondo soberano galego dotado de 1.200 millóns de euros até 2030 para investimentos estratéxicos

   SANTIAGO DE COMPOSTELA, 21 Abr. (EUROPA PRESS) -

   A portavoz nacional do BNG, Ana Pontón, avanzou este luns que no Debate sobre o Estado da Autonomía proporá a creación dun fondo soberano galego para tratar de atraer investimentos estratéxicos e que estará dotado inicialmente con 400 millóns de euros coa previsión de chegar a 1.200 millóns no ano 2030.

   Baixo o nome 'Fondo Nova Galiza Innovadora', o obxectivo é priorizar proxectos "estratéxicos, sustentables e con raíz" para ser "un motor de transformación e fortalecemento do tecido industrial galego".

   Así o destacou en rolda de prensa a líder nacionalista, que sinalou que se trata dun instrumento para facer "política con maiúsculas" e que o Goberno galego tome "as rendas da política tecnolóxica e industrial".

   Tal e como explicou, a iniciativa conta con tres obxectivos: dinamizar o investimento en sectores estratéxicos (enerxético, alimentario, forestal, naval ou aeroespacial, entre outros); defender a galeguidade e o enraizamento das empresas; e impulsar o desenvolvemento de sectores emerxentes e con gran capacidade de crecemento.

   Nesta liña, Pontón subliñou que este fondo é unha iniciativa "nova, ambiciosa e transformadora". "Trátase dunha iniciativa ambiciosa porque supón pensar Galicia en grande. Falamos da maior mobilización de fondos públicos da historia de Galicia, queremos integrar e superar algúns instrumentos que estamos a ver que teñen moitas limitacións", manifestou despois de denunciar que durante os gobernos do PP a taxa de investimento "caeu en picado" e sitúase "por baixo da media do Estado".

   Tamén valorou que é un proxecto "transformador" que, segundo detallou, permitirá que o sector público "actúe directamente na transformación, investindo en sectores estratéxicos".

"CAMBIO ABSOLUTO"

   Ademais, apuntou que supón un cambio "absoluto" no modelo de "canalización de fondos públicos". En concreto, trasladou que sería un modelo "centrado nos investimentos estratéxicos" nos que poderán colaborar "outro tipo de entidades do sector público", como entidades locais ou universidades, exemplificou.

   "Trátase dun cambio de filosofía para ter un instrumento que nos permita facer investimentos a longo prazo e tendo claros cales deben de ser os sectores prioritarios. É un instrumento que nos vai a permitir investir en sectores emerxentes e con capacidade de crecemento", relatou.

   Así mesmo, tras lembrar que esta será unha das propostas que leve o Bloque ao Debate sobre o Estado da Autonomía, Pontón indicou que acoden a esta cita co obxectivo de "darlle futuro aos galegos". "Impórtanos Galicia e cremos que a política é iso: pór sobre a mesa alternativas que nos permitan construír un futuro mellor", aseverou.

   Cuestionada sobre como cre que verán o resto de grupos parlamentarios esta proposta, a líder do BNG subliñou que os nacionalistas acoden "con ánimo construtivo" e defendeu que é importante que se centren "en propostas que poñan no centro ás persoas".