Un bombeiro galego na Guaira avisa de "falta de medios" e un posible "problema de saúde" polo estado dos corpos

   SANTIAGO DE COMPOSTELA, 29 Jun. (EUROPA PRESS) -

   O presidente e fundador da ONG Briegal, Manoel Tato, que se atopa realizando tarefas de rescate na Guaira, subliñou que o país latinoamericano ten unha "falta de medios importante" e alertou ante un futuro "problema de saúde importante", debido ao estado de descomposición dos corpos.

    Este bombeiro ferrolán explicou, en declaracións a Europa Press, que na xornada do domingo chegaron á parroquia de Caraballeda, onde fixeron labores de "avaliación, procura e rescate", pero "non atoparon a ninguén con vida".

    "A zona está bastante prexudicada, hai moitos edificios caídos. Os cadáveres que atopamos están nun nivel de descomposición moi alto, a temperatura é moi alta", sinalou desde a zona deste dobre terremoto de magnitudes 7,2 e 7,5 rexistrado na xornada do mércores (medianoite do xoves 25 na España peninsular e Baleares) en Venezuela.

   Na xornada deste luns, o equipo de bombeiros vai de camiño a unha nova zona asignada, situada un pouco máis ao norte de Caraballeda, na que aínda "non" houbo traballos de procura.

    "Creo que, en breve, teñen que empezar a meter máquinas porque se pode vir encima un problema de saúde importante. Hai moito cheiro a descomposición", alertou Tato, que este sábado xunto a dous bombeiros da Coruña, outros tantos de Ferrol, un de Estaleiros Navantia e dous do Consorcio Provincial da Coruña, puxo rumbo a Venezuela.

    A continuación, subliñou que "están a chegar moitos equipos de rescate", pero que, "por desgraza, todos chegaron tarde". "Se puidésemos chegar no tempo que nos din todos os estudos e manuais é posible que puidésemos facer algo máis, porque a verdade é que a falta de medios que teñen é importante", lamentou.