A creación de empresas descende un 15% en marzo en Galicia

A CORUÑA 12 May. (EUROPA PRESS) -

Galicia situouse en marzo deste ano como unha das sete comunidades autónomas que presentaron descensos interanuais na constitución de sociedades mercantís, cunha diminución do 15,1% en taxa interanual, segundo datos difundidos este luns polo Instituto Nacional de Estatística.

En marzo, foron un total de 361 as sociedades contituidas e 108 as disoltas. En relación ás primeiras, 161 foron en A Coruña; 139 en Pontevedra; 37 en Lugo e en Ourense, 24. Mentres as disoltas foron 42 na provincia coruñesa; en Lugo, 26; en Pontevedra, 33 e en Ourense, un total de sete.

A nivel estatal, o número de novas sociedades mercantís baixou un 0,8% en marzo respecto ao mesmo mes de 2024, até sumar un total de 10.596 empresas, a súa menor cifra nun mes de marzo desde 2020.

Co descenso interanual de marzo, moi inferior ao de febreiro (-20%), a creación de empresas encadea tres meses consecutivos de retrocesos. Para a constitución das 10.596 empresas creadas o pasado mes de marzo subscribíronse máis de 372,5 millóns de euros, o que supón un 21,2% menos que no mesmo mes de 2024, mentres que o capital medio subscrito, que se situou en 35.157 euros, baixou un 20,5%.

Pola súa banda, a disolución de empresas avanzou un 8,5% interanual no terceiro mes do ano, con 1.984 sociedades desaparecidas, o que supón que cada día de marzo pecháronse 64 empresas.

Das 1.984 compañías que se disolveron nese mes, o 81,9% fixérono voluntariamente e o 7,4% desapareceu após fusionarse con outra sociedade.

O 19,8% das sociedades mercantís que se crearon en marzo dedicábase a actividades inmobiliarias, financeiras e de seguros e o 15,8%, ao comercio. En canto ás sociedades disoltas por actividade económica principal, o 19,1% pertencía ao comercio e o 16% á construción.