Decretan prisión para o detido após matar á súa parella na Coruña

A CORUÑA 17 Jun. (EUROPA PRESS) -

O xulgado decretou prisión provisional comunicada e sen fianza para o home detido o domingo, día 15, pola morte da súa parella na Coruña, após pasar este martes a disposición xudicial.

O asasinato da muller produciuse na rúa San Isidoro, na Sacra Familia. A vítima recibiu, segundo informou o luns a subdelegada do Goberno na Coruña, María Rivas, decenas de puñaladas con "bastante enseñamiento".

O home foi o que confesou a súa exmuller -- coa que ten dous fillos en común -- "que acababa de matar á súa parella actual" e foi ela quen avisou a Emerxencias. Após acudir a Policía Nacional ao domicilio no que convivían, procedeuse á detención do presunto agresor e localizouse o coitelo.

A falecida estaba incorporada no sistema VioGén con motivo dunha agresión física rexistrada en setembro de 2024. Nese momento, explicou a subdelegada do Goberno, aplicouse o Protocolo Cero, activado para actuar de oficio "cando as vítimas non se deciden a denunciar nun contexto de espiral de violencia de xénero".

Esta agresión derivou en procedemento xudicial que o pasado 27 de maio concluíu cunha sentenza "condenatoria" para o home que incluía unha "pena de afastamento en fase de execución".

Agora decrétase o seu ingreso en prisión por asasinato, ademais de quebrantamento da mesma, informou o Tribunal Superior de Xustiza de Galicia (TSXG). O detido, de 61 anos, orixe peruana e nacionalidade española e a vítima -- de 49 anos e peruana -- contraeron matrimonio en maio.