Desmantelan un punto de venda de drogas en Muros (A Coruña)

    SANTIAGO DE COMPOSTELA, 14 Mar. (EUROPA PRESS) -

   A Garda Civil do Posto de Muros, en colaboración coa Garda Civil do Posto Principal de Boiro, desmantelou un punto de venda de sustancias estupefacientes e detivo a un home como presunto autor dun delito contra a saúde pública en Muros.

    Segundo informan nun comunicado, os feitos sucederon por mor de ter coñecemento o posto da posible existencia dun punto de venda de sustancias estupefacientes na súa localidade, "co consecuente malestar dos veciños da zona".

    Así, após a análise da información recibida, os gardas civís actuantes lograron a localización do inmoble no que presunta mente se realizaban este tipo de actividades ilícitas, así como indicios do desenvolvemento das mesmas. Por iso, solicitaron un mandamento de entrada e rexistro á Autoridade Xudicial.

    No transcurso do mesmo localizáronse diversas sustancias estupefacientes, as cales estaba a manipular para a preparación de doses individuais, útiles para o pesado, preparación e envasado das mesmas, 320 euros en moeda fraccionada e diversos obxectos posiblemente relacionados con delitos contra a propiedade e utilizados como medio de pago das sustancias.

    A Garda Civil procedeu á detención do home como presunto autor dun delito contra a saúde pública, o desmantelamento do punto de venda e a incautación dos efectos atopados. A investigación continúa aberta e non se descartan novas detencións.