Films de Nerea Barros, Diana Toucedo e o cineasta luso Miguel Gomes, entre 26 títulos que apoia a Xunta con 3 millóns

   SANTIAGO DE COMPOSTELA, 22 Jul. (EUROPA PRESS) -

   Films das directoras galegas Diana Toucedo e Paula Cons, unha película documental de Nerea Barros, unha serie de Sonia Méndez e o novo filme do recoñecido director luso Miguel Gomes --en idioma portugués--, chamado 'Selvajaria', son algúns dos 26 títulos aos que a Xunta destina axudas por 3 millóns de euros para o audiovisual.

   A Axencia Galega das Industrias Culturais (Agadic) publica a concesión da convocatoria anual de subvencións á produción e coprodución de proxectos para a realización de 12 longametraxes, 12 curtas e dúas series.

    Ademais, oito das longametraxes veñen avalados pola concesión en anos anteriores das axudas do Goberno galego para a escritura do guión e para o desenvolvemento previo das tarefas de preproducción.

   Esta é a liña con maior investimento do nove destinadas en 2025 a este sector, que supoñen unha dotación total de máis de 6,8 millóns de euros para apoiar as distintas fases desde o proceso creativo até a estrea nas pantallas.

LONGAMETRAXES

   Na categoría de longametraxes, apóianse cinco proxectos de ficción con axudas de 300.000 ou 320.000 euros e outro cinco de xénero documental, con dotacións que se sitúan entre os 80.000 e os 120.000 euros.

   Na modalidade de ficción atópase o thriller en idioma español 'Petróleo', producido por Zuzú Cinema SL baixo a dirección de Álvaro Pulpeiro, quen escribe a historia xunto á colombiana Laura C. Solano.

    Xa en versión orixinal en galego finánciase 'A morte nos teus ollos', de Sétima S. Coop. Galega, unha proposta de cinema negro baseada nunha historia real coa dirección de Guillermo de Oliveira e coescrita con Miguel Barros.

   'Merlo branco', de Valen Arts Paraíso AIE, do director Alberto Díaz xunto a Kyong Sik Suh Oh como coguionista. A nova longametraxe da cineasta Diana Toucedo, 'Querer vivir un berro', de Miramemira SL, e 'Gloria e Olvido', presentada por Villamiseria AIE, con dirección e guión de Paula Cons a partir da idea orixinal de Victoria Teijeiro, tamén coguionista.

   No referente ás películas documentais, todas en versión orixinal en galego, as subvencionadas son: 'Nacenza', de Matriuska Producións SL, dirixida por Amador Lorenzo e coescrita con Diana Pacheco, onde se retrata o labor dun veterinario rural do Macizo Central de Queixa-Manzaneda; 'As aspas', presentada por Sétima S. Coop. Galega, onde Berio Molina mostra a realidade de tres amigas neurodivergentes e residentes en Santiago de Compostela; 'O da miña nai', Zeitun Films SL, unha proposta na que Nerea Barros pretende atopar o legado do pai a través da memoria da súa nai; 'Toxo', presentado por Tamboura Films SL, onde Gael Herrera na dirección e María Rodríguez no guión achegan a historia do inventor dun combustible feito coa planta do toxo; e 'Caso práctico', de Somadrome Films SL, da directora Ruth Chao acompañada na escritura por María Chao e Alphonse de la Puente.

   En canto á categoría de coproducións internacionais con participación minoritaria española, a Xunta contribúe con 160.000 euros para cada unha de dúas películas en lingua portuguesa. Trátase de 'Selvajaria', dirixida polo reputado cineasta luso Miguel Gomes, na que participa a galega Filmika Galaika xunto a produtoras de Portugal, Brasil, Francia e Italia, e 'Desgarrada', do tamén portugués Flávio Ferreira, unha película de Portugal coa implicación de Cósmica Producións en Galicia.

UNHA SERIE DE FICCIÓN E OUTRA DOCUMENTAL

   Outros apoios van á serie de ficción 'Ugeres', de Miramemira SL en coprodución con Portugal, baixo a dirección de Sonia Méndez e con guión de Lida Fraga, que recibe unha axuda de 260.000 euros.

   Mentres, a serie documental 'Destino próxima Centauri', de Somadrome Films, SL e con Ruth Chao como directora e coguionista xunto a Alphonse de la Puente, conta con 100.000 euros de achega.

CURTAMETRAXES

   Finalmente, estas axudas cofinancian con 15.000 ou 20.000 euros a realización de 12 curtametraxes: 'Nos lobos da terra' (Omen SCP), de Lara Castro; 'Antes de nada' (Rebordelos SL), de Sabela Eiriz; 'A boa filla' (Jacobo García Fernández), de Paula Romeu; 'Canto dura unha montaña' (Sombriza Films), de Fran Rodríguez Casal; 'Lenon' (Meridiano Films); 'Avisa cando chegues' (Cristela Torres Nine); 'Lache' (Algarabía Animación SC); 'Noutro tempo' (Amateurfilms SL); 'Señora Azul' (Gaitafilmes SL); 'Nemeto' (Mala Herba Producións).

   Tamén os curtos de animación 'Terra' (Gonzalo Enríquez Veloso), de David Fidalgo; e 'Becho' (Artyc Content SL), de Lau Maquedano.