LUGO, 8 Feb. (EUROPA PRESS) -
O presidente do comité de empresa de Alcoa-San Cibrao, en Cervo (Lugo), adiantou este sábado que os ministerios de Transición Ecolóxica e de Industria presentarán este luns pola tarde o estatuto das empresas electrointensivas, que permitirá abaratar o custo da enerxía e podería garantir a viabilidade da factoría.
Así o confirmou a Europa Press José Antonio Zan, quen este mesmo sábado o avanzou nunha entrevista na Radio Galega. En concreto, indicou que, segundo trasladou o Goberno aos sindicatos, a presentación será ás 17,00 horas.
Ademais, o presidente do comité de empresa de Alcoa-San Cibrao explicou que desde ese momento "abrirase un período dunha semana" para que todos os axentes implicados poidan formular as alegacións que estimen convenientes.
No entanto, Zan xa asume que o Goberno "non" establecerá un contrato cun teito e un chan para o prezo enerxético das electrointensivas como pedían, pero esixe que "como mínimo" o estatuto permita "que baixe dos 40 euros o megawatio".
Neste sentido, asegura que en países como Francia ou Alemaña o megawatio se sitúa nos 31-33 euros e que "por cada euro de diferenza" no prezo, á planta de San Cibrao lle supón un custo de "tres millóns de euros".
Así, Zan insiste en que o texto que lles trasladaron en xaneiro á mesa de seguimento "non chega". "O que queremos ver é o estatuto no seu conxunto para poder facer unha valoración clara e poder facer números e saber exactamente en canto deixamos o prezo do megawatio en España", engade.
Tras máis dun ano de protestas, este venres os traballadores de Alcoa-San Cibrao comezaron novas mobilizacións nos municipios da Mariña a través da distribución de lazos azuis e a repartición de carteis reivindicativos polos distintos comercios.
