Lanzan unha campaña de recollida de firmas para levar ao Parlamento unha lei que promova medidas a favor do galego

   SANTIAGO DE COMPOSTELA, 28 Oct. (EUROPA PRESS) -

   A plataforma Queremos Galego lanzou este mércores unha campaña para recoller 10.000 firmas para levar ao Parlamento a Iniciativa Lexislativa Popular (ILP) 'Lingua Vital', unha proposta de lei que ten como obxectivo garantir a presenza do galego en todos os espazos e para todos os usos.

   "O galego está en emerxencia, pero a situación pode reverterse co compromiso das organizacións sociais e dos poderes públicos", proclamou o portavoz de Queremos Galego, Marcos Maceira, nun acto na Praza de Cervantes, en Santiago.

   Alí, Maceira lembrou que esta ILP recolle parte do traballo que levan desenvolvendo desde hai meses centenares de organizacións e entidades sociais de diferentes ámbitos ao redor da plataforma para acordar unha lexislación a favor do galego.

   Nesta liña, o portavoz da plataforma defendeu que é necesaria unha normativa que asegure que "quen xa fala galego poida facelo sempre" e que "quen queira sumarse, nacese onde nacese, poida facelo sen obstáculos e sen límites".

   Deste xeito, a proposta pretende que se abran as portas ao galego en todos os espazos e derrogar "leis e normas que o frean", incluído, engadiu, o decreto de plurilingüismo na educación.

   Entre outras cuestiones, a lei recolle que o galego sexa lingua vehicular, de acollida e de integración na educación; garantir os dereitos lingüísticos; asegurar a súa presenza na cultura, no audiovisual e nos medios de comunicación; e reclamar o lugar do galego no mundo, en todos os territorios onde é lingua propia, coa oficialidade na Unión Europea e a integración na lusofonía.

   Ademais, Maceira sinalou que a ILP xa se debateu en diferentes plenos municipais e aprobada xa en Pontevedra e en Brión, cos votos dos grupos do BNG e do PSOE, mentres que este xoves, expuxo, debaterase en Moaña e en Santiago.

   Todo iso nun contexto no que a Cámara aprobou este mesmo mes a actualización do Plan Xeral de Normalización Lingüística após un pacto entre PP e PSOE e que para A Mesa supón "un retroceso para o galego".