Lores confirma que volverá presentarse á Alcaldía de Pontevedra en 2027

   PONTEVEDRA, 16 May. (EUROPA PRESS) -

   O alcalde de Pontevedra, Miguel Anxo Fernández Lores, confirmou este venres que se presentará á reelección nas eleccións municipais do 2027. "Síntome moi ben e aspiro a que Pontevedra siga avanzando. A decisión está practicamente tomada", afirmou.

   No transcurso dun almorzo informativo celebrado este venres para facer balance do ecuador do mandato, o rexedor pontevedrés anunciou que "con toda seguridade" repetirá como cabeza de lista do BNG para aspirar a un oitavo mandato como alcalde.

   "Teño ideas, forza e experiencia para seguir traballando por esta cidade", asegurou neste acto no que compareceu arroupado por todo o grupo de goberno municipal xunto aos máximos responsables da executiva local do Bloque.

   Lores indicou que, "na medida que os cidadáns queiran", está "disposto a seguir traballando" pola cidade do Lérez. É máis, lembrou que o proxecto co que se presentou ás municipais de 2023 era un plan para "oito ou dez anos", aínda que xa pensa en "ampliar ese prazo", porque coas iniciativas que ten en marcha o seu goberno é "imposible" completalo nese tempo.

   "Estou nun momento espléndido da miña vida persoal e política", reiterou Miguel Anxo Fernández Lores.

BALANCE DE MANDATO CON PONTÓN

   O vindeiro xoves, 22 de maio, as 20.30 horas, na Sala Zennet, o BNG realizará un acto aberto a toda a cidadanía pontevedresa para facer balance de metade de mandato. Contará coa intervención do alcalde e da portavoz nacional do BNG, Ana Pontón.

   No balance adiantado este venres aos xornalistas, o alcalde de Pontevedra enumerou proxectos licitados, adxudicados ou en execución nos últimos dous anos e tamén destacou a boa situación financeira do Concello.

   Fernández Lores repasou entre as principais accións do goberno local: o novo contrato de residuos, o parque da Parda, a renaturalización do río Gafos, o novo viario de Mollavao, a reforma de Rosalía de Castro, o futuro edificio de emerxencias, a rehabilitación do vello conservatorio, a renovación da cuberta do tren en Doce de Novembro, o cambio a LED da iluminación ou o saneamento e abastecemento de auga no rural e os investimentos en Monte Porreiro, entre outros proxectos.

   Tamén destacou a aposta municipal polos grandes eventos deportivos, co triatlon á cabeza, ou culturais como os festivais de música, as festas, os Premios Feroz ou toda a programación prevista con motivo do Ano Castelao.

   "Que a ninguén se lle ocorra que tiramos a toalla co saneamento da ría e o traslado de Ence", engadiu, porque é "algo que vai no noso ADN".