En Marea exhibe forza en Cangas con Beiras e Ferrín

O líder de Anova advirte, ante o discurso do PP de proxecto "sólido", que el viviu "40 anos de estabilidade política co franquismo"

CANGAS (PONTEVEDRA), 13 (EUROPA PRESS)

As número un e dous da candidatura de En Marea ao Congreso recalaron este domingo na bisbarra do Morrazo nun acto de exhibición de forza no que participaron o líder de Anova, Xosé Manuel Beiras, e o aspirante ao Senado, Xosé Luis Méndez Ferrín, e no que Alexandra Fernández fixo sacar o zapato da "desobediencia" civil á que chamou o histórico dirixente nacionalista.

O municipio de Cangas, onde goberna ACE (Alternativa Canguesa de Esquerda) xunto a outras dúas formacións --BNG e Aspun--, é unha das prazas simbólicas da Marea, xa que, como este domingo recordou Méndez Ferrín, aquí naceu a primeira das candidaturas de confluencia, niño para a creación de Alternativa Galega de Esquerda (AGE) e as mareas municipais que se presentaron nas pasadas eleccións.

Precisamente, en maio deste ano, tamén no domingo previo á cita coas urnas, paraban en Cangas o propio Beiras e a coordinadora nacional de Esquerda Unida e agora candidata ao Congreso pola Coruña, Yolanda Díaz. Entón, os líderes da coalición que irrompeu nas galegas de 2012 con nove deputados, xa chamaran a lograr unha "marea galega" ou unha "fronte popular" para as xerais, de agora, e as autonómicas do próximo ano.

"Cangas é o primeiro exemplo ao mundo de recuperación da fronte popular do 36, que fixo posible resistir á barbarie de Alemaña. Ese espírito de fronte popular ten que ser recuperado cada vez que o pobo necesite dar pasos adiante", resaltou o candidato a senador e que tamén foi presidente da Real Academia Galega (RAG), antes de proclamar que a historia "xamais obvia" a confluencia. "Estamos unidos", reivindicou.

Ferrín tamén defendeu a diversidade desas "forzas lealmente unidas e fraternalmente unidas" que aspiran á república, federalismo ou independencia, e contradixo, veladamente, aos que acusan os nacionalistas galegos de aliarse con forzas "españolistas". "Castelao era federalista, hoxe loitaría pola independencia (de Galicia), creo eu", manifestou, con medio ton de broma.

O aspirante ao Senado, que procede da FPG, tamén esgrimiu as alianzas para o goberno portugués, dos socialistas, o Bloco de Esquerdas e o "glorioso" Partido Comunista luso; así como se referiu a Venezuela, onde --dixo-- "volveremos gañar". "O camarada Maduro segue aí, volveremos gañar", proclamou.

No peche do acto, a número un para o Congreso, Alexandra Fernández, apelou a que En Marea "non quere outra transacción" como a Transición española. "É o momento de botalos", exhortou, antes de comprometer, entre outras propostas, "derrogar o artigo 135", onde se recolle a prioridade da débeda, fronte a medidas para a cidadanía como as que permitan "acender a calefacción".

ESTABILIDADE POLÍTICA DO FRANQUISMO

Ao histórico da FPG seguiuno outro veterano, Xosé Manuel Beiras, quen recordou o alcume de "Ferro" para o escritor. "Ferro e eu tivemos 40 anos do que é estabilidade política absoluta, era absolutamente estable, ¡inamovible!", resaltou Beiras, deostando, veladamente, o discurso de "único" proxecto "sólido" que proclaman os líderes do PP tanto no Estado como en Galicia, Mariano Rajoy e Alberto Núñez Feijóo.

"E a cousa ten bastante vixencia, porque xa levamos uns poucos anos que vivimos no franquismo sen Franco, coa gravidade de que son os mesmos métodos, e diferentes morfoloxías", advertiu Beiras, quen volveu apelar á historia da confluencia galega e da "emerxencia" de movementos como o Nunca Máis coa catástrofe do 'Prestige' e o "señor dos hilillos" para apelar á forza da xente nas eleccións.

Así, tras recordar as loitas obreiras ou das mulleres das fábricas de conservas, e tras censurar que "eles sós, coa maioría absoluta, queren aplicar a leis inxustas", Xosé Manuel Beiras proclamou que "hai que entender que por enriba das leis está a xustiza".

"E cando a lei é inxusta, o deber dos cidadáns é desobedecela, violala, incumprila", exclamou o autor de 'Exhortación á desobediencia', quen apostilou que, a próstrea, "tamén chegar" ás institucións para "darlle a volta" a esa lei. "Porque a xustiza está por enriba da lei", sentenciou.

Beiras concluíu que "isto é o que significa En Marea, é a expresión do fenómeno que emerxeu durante as municipais, en virtude do que cidadáns de moi diversas índoles, inseridos na sociedade en distintos segmentos" uníronse para combater as políticas actuais.

"ESPERO QUE RAJOY NON ME LEVE NO PETO"

Por outro lado, e despois de que a cabeza de lista polo PP dixese que Mariano Rajoy tiña a "Cangas na súa cabeza e no seu corazón", non faltaron as ironías dende a tribuna de oradores no mitin, que se celebrou no salón de plenos do Concello. Precisamente, o seu alcalde, Xosé Manuel Pazos, ironizou con que a el, como rexedor, "onde" o levará.

Así, confiou en que non lle poña no "peto", porque igual nel ten "billetes de Bárcenas" e non quere convivir con eles, apostilou. "Nin no cerebro, nin no corazón, onde ten que estar é na rúa e o 20 de decembro ímolo botar á rúa", repuxo e resaltou o rexedor canguense.

Ademais, e ante un salón abarrotado no que non couberon todos aqueles que se achegaron, tamén interveu a número dous por Pontevedra, Ángela Rodríguez 'Pam', quen procede do 15M, movemento ao que apelou e do que dixo que "nos acordamos do que fixemos en moitas prazas". "Habería que dicirlle tamén Mariano, se forte, porque o cambio non hai quen o pare", resaltou.

AMBIENTE FESTIVO E ZAPATO EN MAN

O acto desenvolveuse nun ambiente festivo que comezou coa chegada en barco da número un rodeada das bandeiras de cores da Marea e acompañada dun grupo de gaitas de Cangas, que se reuniu cos demais candidatos e recibiu o afectuoso abrazo de Beiras.

Antes de rematar o acto foi ela a que apelou a quitar o zapato e levantalo como símbolo desta candidatura de 'rebelión' cidadá. "Non hai futuro sen memoria; non hai Vigo sen Cangas, non hai nós sen vós, o 20D imos xuntos En Marea", arengou Alexandra Fernández.