SANTIAGO DE COMPOSTELA, 12 Feb. (EUROPA PRESS) -
O vicepresidente do Encontro Irmandiño e alcalde de Teo, Martiño Noriega, proclamou na asemblea aberta que celebra este partido para decidir sobre a súa continuidade na formación do Bloque Nacionalista Galego: "Hai que comezar un novo camiño fóra do BNG".
Nunha breve intervención ante os asistentes nun conclave histórico para o futuro da formación nacionalista, Noriega asegurou que "hoxe é un día no que doe o corazón", pero tamén é unha xornada "para a esperanza".
O novo político nacionalista recordou que o mandato do Encontro Irmandiño na súa asemblea constitutiva foi o de "refundar e rexenerar", ante o que concluíu: "Fracasamos".
De este modo, Martiño Noriega, que foi fortemente aplaudido pola asemblea deste domingo tras a súa intervención --con persoas postas en pé como o líder do EI, Xosé Manuel Beiras, ou Concha Trigo-- asegurou que a sociedade "demanda" unha nova alternativa. "Se non o facemos nós, farano outros", sentenciou.
Por iso, o dirixente 'irmandiño' tamén avisou da necesidade de "abandonar posicións prefixadas", así como de "abrir os ollos e as orellas". "Decidades o que decidades, camiñarei convosco", agregou.
