Morre un home de 31 anos tras ser ferido de bala por un policía nun operativo antidroga en Cambados

   VIGO, 16 Jun. (EUROPA PRESS) -

   Un home de 31 anos de idade, de iniciais J.S.T, morreu na mañá deste martes no municipio pontevedrés de Cambados tras recibir un disparo efectuado por un axente da Policía Nacional, no transcurso dunha operación antidroga que se levaba a cabo en ditintos puntos da comarca do Salnés.

   Segundo fontes coñecedoras da operación consultadas por Europa Press, os feitos producíronse na zona de Corbillón, en Cambados, e o falecido era un dos investigados en relación co tráfico de drogas.

   O propio hospital do Salnés confirmou o falecemento do home, que ingresou sobre as 7.30 horas ferido de bala. "O paciente faleceu pouco despois durante as primeiras atencións de emerxencia efectuadas polo equipo asistencial do hospital arousán, tras agravarse de forma crítica o seu estado de saúde", apunta o centro hospitalario nun comunicado.

   En declaracións a Europa Press, o avogado da familia do falecido, Guillermo Presa, asegurou que "non se produciu ningún tiroteo", senón "un único disparo da policía".

   "Estaba espido en cama, a Policía rebentou a porta, asomouse para ver que pasaba e recibiu un disparo", relata o avogado, á vez que asegura que na vivenda os axentes "non atoparon ningunha arma". Por conseguinte, abriuse unha investigación por homicidio da cal se fixo cargo a Garda Civil.

   No marco do operativo antidroga leváronse a cabo rexistros en Vilanova, Vilagarcía, Cambados e Ribadumia e foron detidas 12 persoas, que pasarán a disposición xudicial o vindeiro xoves.