Os colectivos antidroga cren que a sentenza "vai polo bo camiño" e piden extremar as medidas para evitar a súa fuga

VILAGARCÍA DE AROUSA (PONTEVEDRA), 11 (EUROPA PRESS)

Os colectivos antidroga galegos acolleron con satisfacción a sentenza da Audiencia Nacional pola que se condena a catro anos e sete meses de prisión ao narcotraficante Laureano Oubiña por un delito de branqueo de capitais procedentes do tráfico de estupefacientes.

O xerente da Fundación Galega contra o Narcotráfico (FGCN), Fernando Alonso, considera que "o importante desta sentenza é que se recoñece que na loita contra o narcotráfico é esencial o que se denomina a vía patrimonial, que é impedir que os narcotraficantes gocen e teñan en propiedade as fortunas acumuladas grazas ao tráfico de drogas".

Neste sentido, Fernando Alonso, incide en que a decisión da Audiencia Nacional "vai polo bo camiño" e supón un avance na loita contra en narcotráfico porque "tras a incautación da droga e a condena dos narcos é necesario embargar e comisar o seu patrimonio para evitar que gocen del".

En similares termos exprésase a presidenta da Fundación Érguete, Carmen Avendaño, para quen o auto da Audiencia Nacional pon en evidencia que "en diante non pode ser tan doado para xente desa calaña branquexar do diñeiro dunha forma tan natural como o facían ata agora".

RISCO DE FUXIDA

Ambos os dous colectivos deron por feito que Laureano Oubiña recorrería a sentenza. "Habitualmente, os capos do narcotráfico empregan todos os medios á súa disposición para evitar entrar no cárcere", comenta o xerente da FGCN.

Neste sentido, tanto Fernando Alonso como Carmen Avendaño coinciden en solicitar que, tendo en conta os antecedentes de Laureano Oubiña, se extremen as precaucións e a seguridade para evitar unha posible fuxida. "Sería imperdoable que despois de repetir tantas e tantas veces que existe ese risco acabase escapando", sinala o responsable da FGCN.

Carmen Avendaño indica que "será a sala quen teña que decidir pero supoño que terá en conta o antecedente de fuga e que procederá en consecuencia". "Pero se non procede e hai que esperar, tamén é unha posibilidade que no Código Penal se recolle. Eu confío no bo criterio da sala e en que se fará o oportuno", conclúe.