A Pobra do Brollón retira o título de 'alcalde honorario perpetuo' a Franco coa ausencia dos edís de PP e PSOE

LUGO, 18 Nov. (EUROPA PRESS) -

Un pleno extraordinario celebrado na tarde deste venres retirou o título de 'alcalde honorario perpetuo' da Pobra do Brollón (Lugo) a Francisco Franco, nun acto ao que non asistiron os edís dos grupos da oposición, PSOE e PP.

O goberno local decidiu dar este paso tras a localización "por casualidade" da acta de concesión a Franco do título de 'alcalde honorario perpetuo' no ano 1967. "Estas accións son un exercicio obrigatorio de saúde democrática que ademais van na liña da Lei da Memoria Histórica", declarou estes pasados días o alcalde, Xosé Lois Maceda (BNG).

Durante o pleno, o rexedor considerou esta decisión unha mostra do "compromiso" do municipio "coa democracia, as liberdades e os dereitos". "Parécenos intolerable que, despois de 40 anos de democracia, aínda teñamos este tipo de títulos para un genocida, un ditador e un asasino", sinalou.

Por iso, os edís do BNG en solitario votaron por unanimidade retiraron este título ao ditador "por calidade democrática" e, "até certo punto, por exercer unha labor pedagóxica" contra "o avance da extrema dereita" en Europa e España, dixo o alcalde.

"É un día de reparación e recoñecemento para aqueles que defenderon a democracia", engadiu Xosé Lois Maceda, que confiou en que sirva para "pechar as cicatrices que, ao longo da historia recente, non se foron pechando e avanzar na convivencia dos cidadáns".

A continuación, lamentou que este pleno extraordinario non contase con debate, dado que "os concelleiros da oposición non tiveron a decencia de estar presentes", dixo o alcalde, que os acusou de "banalizar" a cuestión.

Antes da votación, Xosé Lois Maceda tivo palabras de eloxio para o Goberno central, coa Lei de Memoria Histórica primeiro e, agora, coa Lei de Memoria Democrática, e dixo que Galicia segue esperando que dunha vez por todas crese" unha Lei de Memoria Histórica de Galicia.

HOMENAXE A ANTONIO REBOIRO

Por outra banda, a sesión tamén serviu para render tributo a Antonio Reboiro Rodríguez, membro do Partido Agrario Radical Galego e que, após anos como edil, foi alcalde en funcións da Pobra desde febreiro de 1936. No pleno tomou a palabra o seu neto, Rafael Castillo, para reivindicar a figura do seu avó e de todos os represaliados.

Así, tal e como acordou o pleno, Reboiro, detido meses despois da sublevación e executado en 1938 após ser condenado á morte nun consello de guerra, dará nome á biblioteca municipal, da que foi o seu primeiro impulsor.