O PPdeG chama á oposición ao "diálogo" para sumar ao Pacto pola Lingua e trasladar "a sintonía social" á Cámara

   SANTIAGO DE COMPOSTELA, 16 Jul. (EUROPA PRESS) -

   O portavoz do Grupo Popular, Alberto Pazos Couñago, fixo un chamamento á oposición ao "diálogo" para poder analizar e "enriquecer" a actualización do Plan de Normalización Lingüística de 2004 presentada este mércores pola Xunta e trasladar "a sintonía social ao ámbito político".

   En rolda de prensa este xoves, Pazos puxo en valor o documentado exposto polo Goberno autonómico. Un texto, ao seu xuízo, "moi traballado" e que "marcará a folla de ruta das políticas lingüísticas para a próxima década".

   "Con este nivel de implicación e participación o resultado tiña que ser o que é: un gran Pacto pola lingua, un gran pacto de país", celebrou.

   Agora, tras ser remitido ao Parlamento galego, o portavoz popular subliñou que se inicia un novo camiño "cara ao entendemento", no que "todos os grupos" terán a oportunidade de "trasladar a gran sintonía social ao ámbito político".

   "Os galegos non entenderían que o acordo que se alcanza con naturalidade na rúa rompa por intereses políticos na Cámara", advertiu Pazos Couñago, lembrando que o documento inclúe "700 medidas para fomentar o uso e prestixio do galego" e pon o foco en "achegar o galego ás novas xeracións, ás persoas nadas fora da Comunidade e ás que carecen de trasmisión dixital", así como nos "novos modelos de comunicación dixital".

   Por todo iso, insistiu en que a "obrigación" de todos os grupos parlamentarios é "deixar ao carón as diferencias partidistas" e protexer "o nexo de unión máis forte dos galegos".

REUNIÓNS COS GRUPOS

   Neste contexto, Alberto Pazos avanzou que proporán a BNG e PSdeG realizar unha serie de reunións de traballo para analizar en conxunto a proposta da Administración autonómica.

   "Pídolles que non a desboten sen estudala con detalle", reclamou para, a continuación, instar os grupos a "aceptar a man tendida" do PP para "o diálogo".

   Estas reunións, asegurou, proporanas "inmediatamente" porque "non hai tempo que perder" para explorar "se existe vontade e elementos suficientes para o consenso".

DECRETO PLURILINGÜISMO

   Ademais, cuestionado sobre a posibilidade de derrogar o decreto do plurilingüismo, Pazos Couñago defendeu que o propio decreto "está aberto a introducir modificacións".

   En todo caso, apuntou que "non se trata de retirar nada", senón de "enriquecer as propostas". "Se se dan as condicións: que exista unanimidade e que se garanta o equilibrio lingüístico. Con esas únicas premisas, que parecen razoables, estamos dispostos a explorar posibilidades de acordo para que o uso do galego se abra a calquera materia", comprometeu.

   Sobre as críticas da oposición, o portavoz do Grupo Popular evitou entrar "en profundidade" e desexou que exista a posibilidade "dun acordo" para "enriquecer o documento" e que sexa "consensuado".

   Nesta liña, non ocultou a súa "decepción" pola "premura" dunhas críticas a un documento que, engadiu, "foi imposible analizar en profundidade en tan poucas horas". "Quero crer que cando fagan a lectura repousada e mirando algunhas das medidas, entendan que hai marxe máis que dabondo para alcanzar un consenso", aseverou.