O PPdeG impide a comisión de investigación sobre Altri e a oposición clama: "Que teñen que ocultar"

   SANTIAGO DE COMPOSTELA, 10 Mar. (EUROPA PRESS) -

   A maioría absoluta do Grupo Popular no Parlamento tombou a proposta da oposición de crear unha comisión de investigación na Cámara sobre a tramitación do proxecto que a multinacional lusa Altri quería instalar na comarca da Ulloa.

   Tanto a portavoz nacional do BNG, Ana Pontón, como a deputada do PSdeG Patricia Iglesias reprocharon ao Goberno galego "falta de transparencia", pondo o foco na sentenza do Tribunal Superior de Xustiza de Galicia (TSXG) que insta á Xunta a manter na súa estratexia verde a protección da zona da Serra do Careón onde se planeaba instalar a factoría, así como nos "acordos secretos" da Sociedade Impulsa e Altri.

   "Pedímoslles que desclasifiquen os papeis secretos de Altri. Se non o fan, só nos demostrarán que teñen moito que ocultarnos", subliñou Pontón, mentres que Iglesias acusou ao Executivo autonómico de "posible tráfico de influencias".

   Pola contra, o portavoz popular, Alberto Pazos Couñago, reprochou os "bulos" da oposición e defendeu a "transparencia" da Xunta. "Encantaríame que o xulgado diga que se pode facer pública esa documentación para poder acreditar todo o que levan mentido e para pedirlles a dimisión", aseverou.

(HABERÁ AMPLIACIÓN)