Rueda alega que medidas represivas e preventivas "caen" ante incendiarios "desalmados" e pide concienciación

   SANTIAGO DE COMPOSTELA, 2 Ago. (EUROPA PRESS) -

   O presidente da Xunta, Alfonso Rueda, lamenta que as "medidas represivas, de prevención, do que sexa", ante os incendios forestais, "caen" fronte á acción de "desalmados" que provocan lumes como os da Cañiza (Pontevedra), que esta semana obrigou a confinar aos veciños de sete núcleos de poboación, tras orixinarse en cinco focos ao longo dunha mesma estrada.

   "Canto menos abandono haxa no monte, unido a canta máis concienciación haxa sobre as consecuencias forestais, iremos avanzando máis e todo iso podémolo plasmar nunha lei moitísimo mellor. Pero hai cousas que as leis non poden facer. Dependen das persoas", reflexiona Rueda nunha entrevista concedida a Europa Press, ao ser preguntado polo horizonte temporal para aprobar a lei de prevención de incendios forestais comprometida.

   Por iso, solicita "unha concienciación da xente sobre o mal que fai, de como poñer en perigo (...) desde logo propiedades e mesmo a vida das persoas".

   Respecto diso, admite que é "moi difícil" pescudar a autoría dos incendios e mesmo, cando un pirómano é detido, "ter as probas suficientes para poder condenalos".

   Aínda así, aposta por "non baixar a garda". "Os incendiarios teñen que saber que se fai todo o posible para pescudar quen son e que caia todo o peso da lei", afirma.

   Rueda preséntase como un firme convencido da eficacia das políticas de prevención e defende que, a pesar de que "ao principio foi complicada a colaboración cos concellos" para inculcar que os "os veciños teñen a obrigación de limpar as franxas preto das casas", si se avanzou "bastante". "Sobre todo nos núcleos habitados, a situación é moi diferente ao que era hai poucos anos", reivindica.

MORATORIA AO EUCALIPTO

   Sobre a moratoria á plantación de eucaliptos, que se extingue a finais do presente ano e obrigará á Xunta a decidir se prorroga, suprime ou modifica a medida, Rueda explica que levan meses con "bastantes consultas internas con todos os afectados".

   Asume que a decisión que se tomará "probablemente non contentará a todo o mundo", pero defende que sexa "o máis consensuada e o máis entendible posible". "Aquí hai moitos intereses e moitos factores diferentes a ter en conta e, ao final, gobernar é decidir. Correspóndenos a nós decidir", comenta, para a continuación insistir na súa aposta por "unha decisión obxectiva, tomada con calma e despois de escoitar a todo o mundo".

   Sobre o horizonte temporal para coñecer a decisión, expón que o Goberno se tomou "o mes de agosto para recompilalo todo" tras o proceso de escoita.

CONFIANZA NO DIRECTOR CONTRA A VIOLENCIA MACHISTA

   Sobre outro tema de actualidade esta semana, a polémica suscitada a raíz do informe do Consello de Contas sobre as políticas da Xunta contra a violencia machista, o máximo mandatario galego responde ao órgano fiscalizador que "o reequilibrio vai en función das necesidades que se detectan".

   Así, mentres Contas apremou ao Executivo autonómico a asignar máis recursos á prevención desta lacra, Rueda argüe que "o orzamento aumentou", pero estimouse a necesidade de "dedicar máis a atender ás vítimas, aos seus fillos...", aínda que defende que tamén se destina diñeiro "ás políticas puras de prevención".

   Respecto diso, reivindica que "Galicia é a única comunidade autónoma que lles proporciona ás vítimas, durante un tempo que se estima necesario para que poidan separarse xa completamente, facer unha vida independente do seu maltratador, unha achega ao mes". "Todos eses recursos foron aumentado porque están aumentado as vítimas", argumenta.

   Ademais, o tamén presidente do PPdeG defende que "non pode haber ningunha dúbida" da postura de condena do seu partido fronte á violencia machista, fronte a "algunhas opcións políticas" nas cales "todo iso se pon en dúbida". "Non teño ningunha dúbida", reafirma e insiste: "debe quedar claro porque hai xente que todo isto o cuestiona".

   Non é o caso, defende, do seu director xeral de Loita contra a Violencia de Xénero, Roberto Barba, un xuíz de familia "moi especializado e moi concienciado porque é un estreito colaborador de asociacións que en Galicia loitan eficazmente contra a violencia machista".

   Ao seu xuízo, é "frivolizar" o que está a facer a oposición ao reclamar a súa destitución porque, nas alegacións ao informe de Contas, este alto cargo sostivo que "na análise realizada a nivel interinstitucional dos asasinatos por violencia de xénero se revela que, en moitos casos, un dos motivos ou detonantes que levou ao agresor a acabar coa vida da muller -e tamén ás veces, a suicidarse el despois-, foi a decisión dela de deixalo ou pór fin á relación que mantiñan".

   "Estou seguro de que sabe do que fala", xulga Rueda. "O centro directivo que leva todo isto ten á fronte a unha persona moi experta, na que eu teño moitísima confianza", agrega.

   "Son unhas alegacións nun procedemento pechado, fronte a un órgano fiscalizador que se mete máis en cuestións económicas que outra cousa, ou iso debería ser. Por tanto, enmarquemos as súas alegacións: non foron nin unhas declaracións públicas nin a contestación a outra contraargumentación. Foron aí exactamente. Eu insisto en que creo que esta persona sabe moi ben do que fala", conclúe.