Rueda avalía con Microsoft vías de colaboración para a transformación dixital e a aplicación da IA en varios campos

   SANTIAGO DE COMPOSTELA, 25 Oct. (EUROPA PRESS) -

   O presidente da Xunta, Alfonso Rueda, mantivo esta semana un encontro co presidente de Microsoft España, Paco Salcedo, para abordar posibles vías de colaboración en ámbitos relacionados coa transformación dixital e o desenvolvemento tecnolóxico, varias delas vinculadas á aplicación da intelixencia artificial (IA) na Administración autonómica e na educación.

   A reunión ocorreu no marco dunha visita do responsable da compañía a Galicia. Durante a mesma, na que Rueda estivo acompañado do conselleiro de Facenda Administración Pública, Miguel Corgos, analizáronse distintas liñas de traballo entre a Axencia para a Modernización Tecnolóxica de Galicia (Amtega) e Microsoft.

   Entre elas, segundo traslada o gabinete do presidente, a aplicación de ferramentas de IA na Administración autonómica, a exploración de oportunidades para o desenvolvemento de infraestruturas de datos en Galicia e a incorporación do galego ás ferramentas de IA da compañía.

   Así mesmo, abordáronse posibles iniciativas vinculadas á formación en IA responsable e á aplicación destas tecnoloxías no ámbito educativo, en liña coas actuacións que se están impulsando en Galicia para avanzar na dixitalización e no desenvolvemento das competencias tecnolóxicas.

REUNIÓN CON AGAVI

   Por outra banda, o presidente da Xunta mantivo esta semana outro encontro coa presidenta da Asociación Galega de Axencias de Viaxes (Agavi), Mar Rodríguez Meseguer, e outros representantes da entidade, no que coñeceu as súas propostas en diferentes campos para apoiar o sector, entre eles o impulso á dixitalización, que a Xunta resalta de cara á modernización destas empresas.

   No encontro, no que tamén participou o director de Turismo de Galicia, Xosé Merelles, o presidente autonómico destacou o "ánimo" que suporá para o tecido empresarial galego a celebración do Xacobeo 2027, no que as axencias de viaxes tamén xogarán un "importante papel".

   De cara a situar Galicia como un destino "competitivo, sustentable e atractivo" durante todo o ano, a Xunta sitúa como "clave" o traballo das axencias de viaxes pola súa contribución á comercialización dos produtos e destinos turísticos galegos e á recepción e acollida de viaxeiros.