Senra denuncia ante a CE a "invasión de especies exóticas" e as obras que "danan as dunas" na praia da Lanzada

Europa Press Galicia
Publicado: viernes, 12 abril 2019 18:19

SANTIAGO DE COMPOSTELA 12 Abr. (EUROPA PRESS) -

A eurodeputada galega Lídia Senra, membro do Grupo Confederal da Esquerda Unitaria Europea/Esquerda Verde Nórdica (GUE/NGL) e candidata de En Marea ás eleccións europeas de finais de maio, denunciou ante a Comisión Europea (CE) a "invasión de especies exóticas" e as "aberracións ambientais" na contorna da praia da Lanzada, no concello pontevedrés de Sanxenxo.

Tal como sinalou GUE/NGL nun comunicado, Senra presentou dous escritos dirixidos ao ente comunitario, para alertalo sobre as "agresións" que se están dando neste areal, "incluído como Zona de Especial Conservación (ZEC) e Zona de Especial Protección para as Aves (ZEPA) na Rede Natura 2000".

Concretamente, un dos escritos está centrado na proliferación de plantas invasoras e outro nas obras levadas a cabo na PO-308, "afectando seriamente as dunas".

Así, Lídia Senra deu conta á CE de que na Lanzada leváronse a cabo dúas fases de rexeneración dunar, quedando pendente de execución desde o 2009 unha terceira, que suprimiría parte do trazado da estrada PO-308, para rexenerar as dunas existentes, ampliar a zona de praia e aumentar a seguridade viaria.

"Con todo, no 2016 comezou unha obra na devandita vía, con fondos europeos Feder, para abrir un carreiro peonil e ciclista, que levou que as dunas pasaron a ser removidas e usadas como zona de almacenaxe de cascallo e como aparcadoiro de maquinaria pesada nas inmediacións, ademais, do conxunto megalítico Con do Corvo mariño, que se viu afectado", indicou a organización política.

Neste sentido, Senra preguntou á CE se ten constancia dos fondos europeos empregados neste carreiro ciclista (aínda non construído) e en todas as obras "daniñas" para as dunas na Lanzada e pediu que se sitúe sobre se considera que son compatibles estas actuacións coas medidas de protección natural desta zona.

HERBAS EXÓTICAS

Por outra banda, a eurodeputada galega tamén explicou á Comisión Europea que a uña de gato (Carpobrotus edulis) e a Herba das pampas (Cortaderia selloana) son plantas que, "polo seu potencial colonizador, constitúen unha ameaza grave para Galicia".

"Con todo, os programas impulsados para a súa erradicación non están a funcionar e un claro exemplo é o Concello de Sanxenxo, e máis concretamente a praia da Lanzada", lamentou.

Segundo Senra, estas especies invasoras proliferan "de forma profusa" por dunas e accesos a praias e os produtos químicos cos que se tenta queimar esas plantas, ao aplicarse en lugares en contacto directo co mar "constitúen un risco alto de contaminar a auga".

Por iso, Senra pediu que se inclúa a estas dúas plantas na lista de especies exóticas preocupantes para a Unión Europea, (como xa está no Catálogo Español de Especies Exóticas Invasoras) e que se sitúe sobre que protocolos deberíanse de seguir contra as invasoras na Rede Natura como é A Lanzada.

Para Lídia Senra, respectar de forma escrupulosa e coidar os espazos naturais protexidos é "fundamental", polo que acusou ás administracións públicas de "facer a vista gorda" ante agresións "tan preocupantes" como as mencionadas e chamou a exercer "con responsabilidade" os deberes de control, "non promocionando obras nin intervencións que están a danar a nosa costa".

Últimas noticias sobre estos temas

Contenido patrocinado