Sonia Ogando asume a portavocía municipal do PP de Ourense

   SANTIAGO DE COMPOSTELA, 14 Oct. (EUROPA PRESS) -

   A edil Sonia Ogando é a nova portavoz do grupo municipal do Partido Popular de Ourense, no que Noelia Pérez exercerá de coordinadora en substitución, respectivamente, de Inmaculada Moreiras e Jorge Pumar.

   Os nomeamentos forman parte do proceso de reorganización do grupo municipal iniciado pola xestora do PP local de Ourense, liderada provisionalmente por Victoria Núñez até a celebración dun congreso.

   Ogando asumiu a acta que deixou libre o candidato á Alcaldía de Ourense nas últimas eleccións locais, Francisco Cabezas, que renunciou ao seu posto como concelleiro a finais do mes de agosto.

   Licenciada en Dereito e procuradora de profesión, Ogando substitúe á até agora portavoz Inmaculada Moreiras, mentres que Noelia Pérez releva a Jorge Pumar.

   A nova portavoz xa foi concelleira no pasado mandato, no que exerceu como responsable da área de Urbanismo durante o tempo que o PP compartiu goberno con Democracia Ourensá.

PAULA PRADO

   Por outra banda, a secretaria xeral do Partido Popular de Galicia, Paula Prado, visitou este sábado o municipio da Veiga (Ourense) para asistir á III Exposición Agrogandeira de Trevinca, onde reivindicou o "compromiso" dos populares co rural.

   Acompañada polo rexedor da Veiga, Juan Anta; o número dous do PP galego defendeu que medidas como as 'casas niño', as 'casas do maior' ou a "política de impostos cero" postas en marcha polo Goberno galego referendan a aposta da Xunta por asentar poboación no rural.

INCENDIO DE VIGO

   Así mesmo, tamén este sábado, a portavoz municipal do PP de Vigo, Marta Fernández-Tapias, instou ao alcalde vigués, Abel Caballero, a dar explicacións sobre a actuación do goberno municipal no incendio do edificio da rúa Alfonso X O Sabio que o pasado mércores causou catro mortos, tres deles menores.

   Nun comunicado, Fernández-Tapias demanda a Caballero que explique se coñecía os informes revelados polos bombeiros e cre que existen "moitos interrogantes" sobre a atención municipal ofrecida "desde o punto de vista social, urbanístico e de seguridade".