SANTIAGO DE COMPOSTELA, 10 Oct. (EUROPA PRESS) -
Talgo asegura que "é tecnicamente imposible eliminar" os datos sobre avarías, despois de que un técnico que traballaba na empresa ferroviaria revelase á asociación de vítimas de Angrois que directivos da compañía ordenaron borrar da base de datos "todas as avarías" detectadas no tren accidentado o 24 de xullo de 2013 en Santiago.
Segundo afirma Talgo, a declaración deste extraballador, que foi despedido o 28 de maio de 2018, "é falsa" e nega "absolutamente" que ocorrese o relatado por el.
O técnico indica, nunha declaración xurada achegada ás vítimas, que o mesmo día do sinistro, "transcorrida unha media hora do accidente, aproximadamente sobre as 21:15, varios directivos de Talgo que acudiron e que non coñecía (...) deron a orde taxativa de borrar todas as avarías que tiña o tren da base de datos do sistema de xestión de avarías".
Así, o mecánico Pablo Andrés Jara Torres sinala que chegaron ao taller de Fuencarral (no que se revisou o tren) directivos de Talgo aos que non coñecía. A orde déronlla a outro empregado de Talgo.
A este respecto, Talgo informa de que, tanto a compañía como os directivos mencionados, "están a iniciar accións legais por calumnias contra o citado exempregado".
"Os directivos de Talgo aos que alude este extraballador nunca pisaron as instalacións de Fuencarral, como falsamente se indica, posto que, inmediatamente en canto tiveron coñecemento, trasladáronse até o lugar onde ocorreu o terrible suceso", explica a empresa a Europa Press.
