O temporal amaina en Galicia despois de centos de incidencias con ventos superiores a 140 km/h e fortes choivas

   SANTIAGO DE COMPOSTELA, 20 Dic. (EUROPA PRESS) -

   O temporal baixou a súa intensidade nas últimas horas en Galicia despois de deixar centenares de incidencias tanto este martes como o luns, con ventos superiores a 140 km/h e fortes choivas que provocaron centos de inundacións en diferentes zonas da Comunidade, especialmente nas provincias da Coruña e Pontevedra.

   Así, segundo os datos de Meteogalicia, os ventos máis fortes durante esta xornada rexistráronse no municipio pontevedrés de Oia, onde se superaron os 100 quilómetros por hora.

   En canto ás choivas, os valores de Meteogalicia reflicten máis de 70 litros por metro cadrado en localidades como Fornelo de Montes, Oia ou Baiona.

   Con todo, a situación é mellor que este pasado luns, cando os ventos chegaron a superar os 140 quilómetros por hora no Penedo do Galo, en Viveiro (Lugo), e rexistráronse choivas de 159,3 litros por metro cadrado en Santa Comba (A Coruña).

PONTEVEDRA, A PROVINCIA MÁIS AFECTADA

   Este martes, a provincia máis afectada polas fortes precipitacións que se viviron en Galicia foi a de Pontevedra, cun total de 82 incidencias, segundo destacou o 112 Galicia.

   En concreto, en Vigo os Bombeiros da cidade olívica tiveron que realizar unha intervención pasadas as 06,30 horas nas proximidades do estadio de Balaídos para evacuar á xente que se atopaba atrapada nun autobús de transporte público da cidade que se internou nunha zona anegada da que non podía saír.

   Ademais, en Mondariz o desbordamento do río Tea provocou a inundación dalgunhas vivendas da zona. Por iso, os Bombeiros de Ponteareas tiveron que achegarse até unha das vivendas do lugar, de dous pisos de altura, posto que había unha persoa dentro que, nun principio, non podía saír.

PLAN INUNGAL

   Neste contexto, a Xunta mantén activo o Plan de Risco por Inundación de Galicia de seguimento sobre o nivel dos ríos debido ás posibilidades de desbordamentos puntuais nos ríos Dubra e Tambre, na provincia da Coruña.

   Segundo informou o 112 Galicia, de acordo coa información de Augas de Galicia, as estacións do Dubra-Tambre superaron xa os límites establecidos, polo que se espera o enchido das canles e aumenta o risco de inundacións.

   Por este motivo, a administración autonómica recomendou a posta en marcha das medidas de auto protección necesarias e tamén a importancia de que a poboación aumente a precaución, sobre todo ao circular por vías ou pontes que se sitúan nas proximidades destes ríos, xa que unha subida repentina podería dificultar a situación e pór en risco ás persoas implicadas.

   Con todo, o alcalde de Val do Dubra, José Manuel Varela, informou a Europa Press que durante a madrugada deste martes "tiveron algún desbordamento" puntual da canle do río Dubra, pero que non causou inundacións senón arrastres e cortes de estrada.

   Por outra banda, fontes da Policía Local de Ames (A Coruña), por onde pasa o río Tambre, detallaron que a situación na xornada deste martes "está tranquila" e que o luns "recibiron cantidade de chamadas" por temas de ramas de árbores pero que "non houbo que lamentar ningunha inundación".