A Unesco dá unha segunda oportunidade á Ribeira Sacra e devolve a candidatura a España para a súa revisión

    LUGO, 27 Jul. (EUROPA PRESS)

   A Ribeira Sacra non será, polo momento, Patrimonio Mundial da Unesco, aínda que a súa candidatura seguirá viva após a decisión adoptada este luns polo Comité de Patrimonio Mundial reunido en Busán (Corea do Sur). Despois de varias horas de debate e de intensas negociacións entre os países membros, o organismo internacional optou por devolver o expediente a España para que poida introducir melloras e completar a documentación antes de volver presentalo, evitando así que o proceso teña que comezar desde cero.

   O pleno do Comité aprobou unha resolución de referral ou devolución técnica, a opción máis favorable cando unha candidatura non consegue a inscrición inmediata. A proposta saíu adiante grazas ao respaldo dun bloque de quince países encabezado por Perú, fronte á postura defendida por outros estados, como Suíza e Chequia, que apostaban por un deferral ou adiamento, unha medida moito máis severa que obrigaría a refacer practicamente toda a candidatura.

   A decisión supón un importante alivio para a candidatura galega e para as administracións que a impulsan, xa que o informe inicial do Consello Internacional de Monumentos e Sitios (Icomos), organismo asesor da Unesco, recomendaba directamente non inscribir a Ribeira Sacra na Lista do Patrimonio Mundial.

   O acordo alcanzado incorpora ademais un elemento considerado clave para o futuro do expediente: a realización dunha misión consultiva do Icomos sobre o terreo. Esta misión permitirá que os expertos internacionais traballen conxuntamente co Estado español e a Xunta de Galicia para perfeccionar a candidatura antes de que volva ser avaliada. O propio Icomos mostrou a súa satisfacción por esta solución e expresou a súa disposición a colaborar na fase final do proxecto.

   Durante o debate, algúns países manifestaron a súa preocupación pola posibilidade de que a candidatura volvese presentarse sen os cambios necesarios. Por iso, acordouse que España deberá solicitar formalmente esa misión de asesoramento para evitar novos bloqueos en futuras avaliacións.

   O traballo pendente centrarase especialmente en ampliar e mellorar a documentación da paisaxe cultural da Ribeira Sacra. Entre as cuestións que deberán reforzarse figuran o inventario e a cartografía do patrimonio hidráulico, así como dos elementos vernáculos e inmateriais vinculados á cultura da auga.

INTERVENCIÓN ESPAÑOLA

   Pola súa banda, a delegación Española a través do embaixador ante a Unesco, Miquel Iceta, defendeu en primeiro lugar a que sexa o Comité o que tome as decisións e non o Icomos, en referencia ao informe que desaconsellaba a súa distinción. Indicou tamén que existen dous problemas na xestión, por unha banda a toma de decisións tendo en conta "informes erróneos" e problemas de diálogo entre vos estados e os órganos asesores.

   Así mesmo, lembrou que España "segue comprometida coa necesidade de valorar as raíces locais no seu papel de gardiá de patrimonio" e felicitou á comunidade da Ribeira Sacra "a de hoxe e a que preservaron durante 15 séculos un ben de indiscutible valor universal en nome da Humanidade". Entre eles citou a Cipriano Marín e Ana Goy, "que tanto traballaron por esta candidatura e que hoxe xa non están entre nós".

   Finalizou a súa intervención facendo referencia aos incendios que arrasan os territorios asegurando que "a defensa do patrimonio ten sempre uns heroes, hoxe sono os bombeiros de España, Francia e tantos outros países que loitan contra o lume".

   Non faltou o agradecemento á proposta de Perú, que deixou aberta a porta ao recoñecemento e aos países que apoiou esta medida e defendeu a candidatura evitando ter que empezar de cero na súa proposta.