Vázquez descarta Ferrol e A Coruña para situar Ence, pero ve As Pontes "posible" á espera do proxecto industrial

Actualizado 23/05/2008 17:21:00 CET

Aplaude que entren socios galegos e apoia vincular as concesións eólicas a proxectos que xeren emprego, pero sen "discrecionalidad"

SANTIAGO DE COMPOSTELA, 23 May. (EUROPA PRESS) -

O conselleiro de Medio Ambiente, Manuel Vázquez, asegurou hoxe que é "inviable" situar Ence nos portos exteriores da Coruña e Ferrol e interpretou que As Pontes (A Coruña) "reúne os requisitos", aínda que descartou confirmar o traslado "ata ver como se presenta o proxecto". "É falar en abstracto", apostilou.

"No Goberno galego que eu coñezo, ninguén puxo enriba da mesa a posibilidade de levar Ence aos portos exteriores", insistiu, ao tempo que engadiu que é "absolutamente imposible", posto que a empresa necesita caudais de auga de máis de 500 litros por segundo. "Faría falta tanta auga case como para todo Ferrol ou para a metade da Coruña", resolveu.

En rolda de prensa en Santiago, volveu facer fincapé en que "de verdade" a situación de Ence nun porto exterior "non ten ningunha base, porque ambientalmente non ten ningún sentido". No entanto, non descartou o municipio coruñés das Pontes posto que "reúne os requisitos ambientais máis idóneos" para a situación da empresa papeleira, aínda que afirmou que iso "ten que decidilo a empresa e poñerse de acordo cos concellos".

Ademais, aprazou a confirmación a "ver o proxecto", porque "hipoteticamente, en liñas gordas" sería "viable", pero "non é o mesmo unha planta de 500.000 toneladas que dun millón, nin é o mesmo que peche o ciclo de papel ou que non". Polo tanto, considerou que falar da posible situación é "falar en abstracto".

Na mesma liña, admitiu que As Pontes sería un destino adecuado para Ence porque conta coa maior masa de eucaliptos de Galicia, ten caudais e masas de auga, un porto preto para evacuar a pasta de papel e un Plan Miner que financia novos desenvolvementos empresariais. Porén, asegurou que "iso non quere dicir que vaia ir para aí". "Quere dicir que, se queren ir para alí, ao mellor poden", agregou.

SOCIOS GALEGOS.

A respecto da nova estratexia empresarial de Ence de incorporar novos socios galegos ao seu conxunto de accionistas, o titular de Medio Ambiente interpretou que é "unha boa noticia" para Galicia porque podería significar que a empresa queda na comunidade, "ou que polo menos esa é a súa vontade". "A min, sóame ben", recoñeceu.

Do mesmo modo, esgrimiu que "é bo e importante" que os desenvolvementos forestais e empresariais de Galicia "se consoliden" e, aínda que incidiu en que "é unha decisión empresarial", defendeu que a produción de papel na Comunidade galega é "unha boa noticia".

COMPENSACIÓN EÓLICA.

Preguntado sobre unha posible compensación aos novos investidores a través de concesións de parques eólicos, Vázquez recordou que "un dos criterios que houbo sempre para favorecer a adxudicación" é que se primen novos investimentos estratéxicos para Galicia, como vía de xeración de emprego na comunidade e diversificación industrial.

Así, aínda que desviou a cuestión á Consellería de Innovación e Industria, asegurou que "non hai discrecionalidade" para repartir os megawatios, algo que, ao seu xuízo, "sería un cacicada". Deste modo, explicou que a suma dos criterios computan e a repartición é "o froito dun traballo".

No tocante á participación pública na repartición eólica, o máximo responsable de Medio Ambiente admitiu que é unha "tentación" que unha parte dos beneficios que xeran as empresas que aproveitan os recursos naturais "revertan nos cidadáns".

No entanto, apuntou que se nunha economía de libre mercado se crea un sistema no que ao Goberno lle toca unha parte, "soa ben"; aínda que indicou que nun Estado de dereito "hai que cumprir unhas regras".

Deste modo, malia que defendeu que "sempre que se utilice un recurso natural para xerar beneficios económicos estes deben reverter nos cidadáns", asumiu que "hai que axustarse ao dereito".