Vivenda atribúe palabras "rotundamente falsas" ao delegado do Goberno: "Non hai fondos do plan estatal"

SANTIAGO DE COMPOSTELA, 6 (EUROPA PRESS)

A conselleira de Vivenda, María M. Allegue, atribuíu palabras "rotundamente falsas" ao delegado do Goberno en Galicia, Pedro Blanco, en relación co investimento en materia de construción de fogares na comunidade autónoma.

En concreto, Allegue, este venres nun acto en Santiago, referiuse a declaracións aos xornalistas que fixo o martes o delegado na Coruña, onde sinalou que "dous de cada tres euros que se invisten en vivenda en Galicia son fondos que proceden do Estado".

"Quero desmentir, porque son rotundamente falsas, as declaracións do delegado do Goberno que dicía esta semana na Coruña que, de todas as vivendas que estamos a construír, dúas de cada tres euros son do estado. É rotundamente falso, e para mostra esta edificación: son fondos europeos, non fondos do estado, fondos do plan estatal non hai ningún", aseverou.

En concreto, referíase a conselleira á actuación que visitaba, cun investimento previsto de 2,7 millóns para 12 vivendas en Santiago da que o 78%, segundo os seus datos, procede da Xunta e os 600.000 euros restantes son fondos europeos do mecanismo de recuperación e resiliencia.

Allegue elevou o investimento comprometido en Galicia a uns 800 millóns de euros, con máis de 3.000 vivendas en marcha das 4.000 que o Goberno galego fixouse como meta, e indicou que 42 millóns son de fondos europeos Feder, outros 42 do mecanismo de recuperación e "máis de 700 son fondos exclusivos da Xunta".

Por iso pediu "recoñecer o gran esforzo" e esixiu o novo plan estatal tendo en conta que entrado marzo aínda "non se ten". "Tendemos a man, pero cando un di cousas que non son reais temos que desmentilas", apostilou.

ESTA PRIMAVERA

Na comprobación do estado da construción das 12 vivendas públicas en Lamas de Abade, Allegue avanzou que "en maio terminan a súa execución, a pesar deste tempo", polas intensas choivas das últimas semanas.

Doce "futuros fogares" que se dedican "todos a réxime de aluguer" e que xa contan co sorteo realizado, polo que existen adxudicatarios provisionais --en fase de comprobación--. O 40% son menores de 36 anos, para "axudar a facilitar a emancipación", subliñou.