PONTEVEDRA, 5 Oct. (EUROPA PRESS) -
A Plataforma por un Novo Hospital para Pontevedra non descarta apoiar o proxecto de ampliación do Hospital Montecelo no que traballa a Consellería de Sanidade, se esta lles proporciona a documentación "que acredite tecnicamente que o que se vaia facer en Montecelo é o mellor". Non obstante, o presidente da Federación de Veciños Castelao, Verísimo Pazos, expresou as súas dúbidas sobre esta posibilidade.
Representantes da Plataforma entrevistáronse co alcalde de Pontevedra, Miguel Fernández Lores, para coñecer o posicionamento do goberno local, malia que no último pleno da corporación os votos do PSOE e do BNG rexeitaron unha moción do PP sobre o apoio á construción dun novo centro sanitario nunha situación diferente á actual.
O encontro co rexedor local celebrouse un día despois da reunión mantida co secretario xeral do Sergas, Cayetano Rodríguez, e a conselleira de Sanidade, María José Louro. O voceiro da Plataforma, Javier Vázquez, mostrouse "moi decepcionado" do resultado desa reunión, argumentando que a Consellería "non vai cambiar de idea".
Tamén dubidan da veracidade dos estudios elaborados por Sanidade: "Ese estudio non está sobre a mesa e non é demostrable", engadiu Vázquez, que considera que o proxecto non permite ampliar a carteira de servizos prevista pola Consellería, nin executar o proxecto nos prazos calculados, a causa das alegacións presentadas polos veciños da zona afectada.
A Plataforma non descarta adoptar medidas de presión, incluídas "unha ou dez manifestacións, como último recurso". Mentres, continuarán apelando ao apoio dos concellos adscritos á área sanitaria de Pontevedra, nos que se presentarán mocións plenarias, ademais de organizar charlas informativas para os colectivos sociais e veciñais de cada zona.
