UVIÉU, 27 de Marzu (EUROPA PRESS)
La patronal Asetra refugó güei sometese a un arbitraxe o aceptar un laudu que "nun respete la llegalidá vixente". La entidá respondía asina al acuerdu algamáu a última hora d'ayeri ente los sindicatos y la patronal del tresporte de viaxeros que permitió la desconvocatoria de la fuelga.
L'acuerdu firmólu Astra, Asvipymet y CAR. La patronal mayoritaria de tresportes de mercancíes quiso unise a esti acuerdu que prevé una subida del 4 por cientu pa esti añu. Asetra nun ta d'acordies n'aplicar una subida del dos por cientu del IPC.
Asetra fizo públicu un comunicáu nel que mostró la so "sorpresa" poles condiciones nes que se celebró'l conceyu de güei na sede de la Cosneyería de Trabayu y Industria, al dir tanto asociaciones, como empreses particulares que "nun tán llexitimaes pa la negociación del conveniu colectivu sectorial vixente".
De la mesma manera, manifestó la "total" sorpresa porque les referíes organizaciones que carecen de llexitimidá algamaren un acuerdu coles organizaciones sindicales, lo cual, en nengún casu ye comprometedor pa les empreses del sector".
La patronal critica amás que se trata de "imponer" esi acuerdu a Asetra, que "sí ye la organización mayoritaria y representativa, la única llexitimada p'algamar acuerdos cola parte social, rellacionaos cola interpretación del conveniu".
En segundu llugar, felicitaron a los sindicatos "por firmar tres dos díes de fuelga unos acuerdos con un conteníu que yá ufiertaren les asociaciones referíes 15 díes enantes del entamu de les movilizaciones".
Asetra confirmó la so postura inicial, al entender que los sos plantegamientos "nun fueron retrucaos por nenguna organización, nin organismos, sinón al contrario, se confirmaron poles consultes plantegaes a los organismos competentes".
