UVIÉU, 22 de Marzu (EUROPA PRESS)
Dos de los comparecientes na sesión d'esti miércoles de la Comisión d'Estudiu del Réxime de Protección de la Llingua Asturiana pidieron a los diputaos de la Xunta Xeneral qu'entamen "dando exemplu" y utilizando la llingua asturiana nes sos intervenciones nel parlamentu autonómicu.
Fueron el llingüista y miembru del Seminariu de Filoloxía Asturiana de la Universidá d'Uviéu, Ramón d'Andrés, y la periodista, Pilar Rubiera, exresponsable de la estaya de Cultura. Xunto con ellos comparecieron l'escritor Xuan Bello y l'escultor Adolfo Manzano.
"Si un númberu apreciable de diputaos falara tolos díes n'asturianu na Xunta Xeneral les coses cayeríen pol so pesu", esplicó d'Andrés, pa quien sicasí "la realidá ye la que ye y non la que nos prestaría".
Un puntu de vista apoyáu por Rubiera. "Si nesti parlamentu falárase asturianu con cierta regularidá, los medios veríense obligaos a treslladar n'asturianu los alderiques y eso fomentaría la formación de periodistes n'asturianu", consideró.
"El fechu de qu'un alderique parlamentariu se faiga n'asturianu tresformaría munches coses, visibilizaría la llingua y ayudaría", añedió. Nesta llinia, preguntó-y directamente a la diputada de Podemos, Lucía Montejo, mientres la vez d'interpelaciones, si utiliza l'asturianu na Xunta. La respuesta de la parlamentaria foi que non, anque esplicó que nun tuvo la oportunidá d'aprendelu na escuela y nel institutu.
Ello ye que los únicos diputaos qu'utilizaron l'asturianu mientres la sesión fueron Nicanor García, de Ciudadanos (Siempre lo fai nes sesiones d'esta Comisión), y Andrés Vilanova (quien siempre utiliza l'asturianu en toles sos intervenciones parlamentaries).
García, pela so parte, recordó que na primer sesión de comparecencies, preguntó al conseyeru de Cultura, Genaro Alonso, n'asturianu, y que'l responsable autonómicu respondió-y en castellán, n'argumentando que la llingua emplaada pol diputáu de Ciudadanos yera 'amestáu' y non asturianu normativu. La presidenta de la sala, Concha Masa (d'IU) empleó solo delles espresiones porque tampoco conoz la 'llingua'.
LLINGUA VEHICULAR
Sobre'l plan pilotu pal usu d'asturianu como llingua vehicular, Ramón d'Andrés, recordó que se trata de "un vieyu deséu nel mundu de la enseñanza". Na so opinión, trátase de "una gran noticia", que namás constitúi un problema "pa los que tienen ganes de buscar problemes onde nun los hai". Insistió en que se trata d'una iniciativa voluntaria ya insistió en qu'hai docentes mui bien preparaos pa exercer esti llabor.
Dende'l puntu de vista de los medios, Rubiera criticó que los propietarios de les empreses "nun tienen intención" de publicar l'asturianu. "Si yo fuera directora d'un mediu de comunicación daría muncha más información n'asturianu", esplicó. Al so xuiciu, "precísase un compromisu cola tierra, y una llei de rangu que motive una oficialidá y que motive a los medios a implicase nel asturianu".
