UVIÉU, 08 d'Abril (EUROPA PRESS)
El Conceyu Asturianu pola Oficialidá (CAO) axuntó yá más de 9.000 semeyes de persones posando col cartel col mensaxe 'Yo doi la cara pola oficialidá', o la so variante na fala d'occidente 'Eu dou a cara pola oficialidá', dientro de la campaña col mesmu títulu que desarrolla esta plataforma de colectivos a favor de la oficialidá de la llingua asturiana.
Según informó nun comunicáu'l CAO, "yá son más de 9.000 persones les que tán apoyando esta iniciativa, dando lliteralmente la cara a favor del reconocimientu oficial pa la llingua asturiana".
El Conceyu Abiertu pola Oficialidá felicítase pol "rápidu" algame de los oxetivos que se marcaron cuando se definió esta campaña: "amosar l'apoyu mayoritariu a la reivindicación llingüística y facer rescamplar qu'esi apoyu trescala tolos ámbitos sociales y xeneracionales de la sociedá asturiana, lo que val pa evidenciar que la verdadera protagonista del procesu de recuperación llingüística ye una ciudadanía plural y non sectaria que camina mui per delantre de la nuestra acomodada clase política".
El colectivu espera algamar los 10.000 apoyos no que queda hasta'l próximu 3 de xunu, fecha na que se cumple un añu dende qu'entamó la campaña. "El llogru de 10.000 apoyos nel primer añu va valir pa sumar munchos más nos próximos meses. Pa ello, el Conceyu Abiertu pola Oficialidá va entamar a llevar la campaña a los conceyos, villes y pueblos d'Asturies", señaló'l CAO.
