UVIÉU, 28 de Mayu (EUROPA PRESS)
El presidente del Conseyu de Comunidaes Asturianes, Manuel Fernández de la Cera, y la direutora xeneral de Promoción Cultural y Política Llingüística, Consuelo Vega Díaz, participen nes distintes actividaes culturales organizaes con motivu del 'Día de les Lletres' na Emigración organizáu pol Gobiernu del Principáu y el Conseyu de Comunidaes.
La Coleutividá Asturiana de Vaparaísu tien ente los sos oxetivos la realización d'actividaes culturales y sociales. Ente les sos más recientes contribuciones ta la creación de la biblioteca Principáu d'Asturies na Escuela Pública España. Esta biblioteca creóse con una dotación de llibros aportada pola propia comunidá asturiana, amás de 6.000 euros del Gobiernu del Principáu. Nesti momentu, tien unos 500 volumes y atiende a 500 neños d'esta escuela asitiada nún de los barrios más humildes y probes de Valparaísu.
Nos actos oficiales d'inauguración de la xornada institucional en Valparaísu (Chile) intervinieron, amás de los representantes del Gobiernu asturianu, Pablo Manzano en representación de l'Academia de la Llingua Asturiana y el presidente de la Coleutividá Asturiana de Valparaísu, Ramón Trespalacios Collado.
Nesta ocasión el Día de les Lletres ta dedicáu a la poesía y s'editó llibru tituláu 'Cuando la memoria fala', nel que se recopilen poemes de diversos escritores asturianos. El Día de Les Lletres nel esterior vien celebrándose alternativamente en centros asturianos d'España (Les Palmes nel 2001, Logroño nel 2004 y Madrid nel 2007), América (Montevideo nel 2002, Bonos Aires nel 2005) y Europa (París nel 2003 y Liexa nel 2006).