UVIÉU, 14 de Mayu (EUROPA PRESS)
L'actual conseyera de Bienestar Social y Vivienda del Principáu d'Asturies, Noemí Martín, el coordinador d'IU d'Asturies y voceru d'IU-BA-Verdes na Xunta Xeneral del Principáu, Jesús Iglesias, y los dirixentes d'IU Luis Álvarez Pérez y Alfonso Suárez Hernández resultaron condenaos como autores responsables d'una falta de coacciones a la pena de multa de diez díes con una cuota diaria de cincuenta euros pa caún d'ellos. Tamién van tener que pagar les costes, incluyíes les de l'acusación particular.
Asina consta nel fallu de la sentencia de la sala de lo Civil y Penal del Tribunal Superior de Xusticia d'Asturies (TSXA), fecha pública güei, y que los absuelve del delitu de coacciones pol que los acusaba l'acusación particular.
El tribunal tamién absuelve a Jesús Iglesias, Noemí Martín, Luis Álvarez, Alfonso Suárez y l'ex conseyeru de Xusticia Francisco Javier García Valledor del delitu de falsedá en documentu priváu y a Alfonso Suárez Hernández del delitu de falsedá d'usu por falta d'acusación. La sentencia puede recurrise ante'l Tribunal Supremu nel plazu de diez díes.
Esti procesu xudicial desencadenóse tres una crisis vivida nel 2007 nel senu de la coalición que derivó, en mayu, nun enfrentamientu y dellos incidentes sobre l'usu de la sede de Plaza América, n'Uviéu, alquilada a IU d'Asturies, pero de la que ye dueñu'l Partíu Comunista.
Les acusaciones tuvieron sosteníes poles acusaciones particulares del Partíu Comunista d'España y pol secretariu xeneral del Partíu Comunista d'Asturies, Francisco de Asís, anque a lo último'l PCE decidió retirar la denuncia.
El TSXA considera como fechos probaos que por orde de los dirixentes d'IU procedióse a cambiar les peslleres de la sede de la Plaza d'América que veníen compartiendo IU, el PCA y otres organizaciones, torgando a la nueva dirección del PCA y a determinaos afiliaos aportar llibremente a los despachos qu'ocupaben.
Amás, los responsables d'IU contrataron un serviciu de vixilantes xuraos que torgaben l'accesu a cualquier persona que nun figurara incluyíu nuna llista d'autorizaos a entrar, por ellos preparada. Too ello, según el xuez, constitúi "sin duda " una coacción, "pues cola actuación de los acusaos torgóse a los perxudicaos la realización d'algo non prohibío en contra de la so llibertá".
Considera'l xuez que nun se pue amparar la conducta de los acusaos na so condición de arrendatarios de la sede y diz que nun tendríen d'actuar con "víes de fechu", sinón que lo que tendríen que facer yera acudir a los procedimientos llegalmente establecíos si queríen llograr la so desocupación. Atribúi'l cambiu de les peslleres y la contratación d'una empresa de seguridá a Jesús Iglesias, Noemí Martín, Luis Álvarez, y Alfonso Suárez, basándose nes sos propies declaraciones.
En cualquier casu, el TSXA considera qu'eses acciones son consideraes como una falta de coacciones prevista nel artículu 620 del Códigu Penal non nun delitu, posibilidá a la que se refier l'artículu 172.1 del citáu Códigu.
El Tribunal considera que se trata d'una "coacción leve", al enmarcase los fechos "nel contestu d'una disputa de carácter políticu referida tanto a la llexitimidá d'un Congresu del Partíu Comunista d'Asturies como a los resultaos del mesmu", algo que llevó a l'anterior dirección a nun reconocer a la surdida del últimu congresu y a nun facilita-y l'usu de los despachos. "La diferencia ente delitu y falta de coacciones afírmase dende la valoración de la gravedá de l'acción coactiva y la idoneidá de los medios pa la imposición violenta, teniendo en cuenta la personalidá de los suxetos activu y pasivu, les sos capacidaes invectivas y tolos factores concurrentes, ambientales, educacionales y circunstanciales en que se desarrolla l'acción", apunta la sentencia na so fundamentación xurídica.
POSIBLE RECURSU
La representación llegal de Francisco de Asís yá señaló que ta estudiando la sentencia y que tán evaluando la posibilidá de recurrir la sentencia, al considerase como falta y non como delitu les coacciones.
Tampoco consideren que seya correcta l'absolución del delitu de falsedá, porque lo que tendría de facer el TSXA yera sobreseer l'asuntu, puesto que se-y torga acusar y practicar pruebes sobre l'asuntu, al entender el Tribunal que nun teníen llexitimidá pa ello.
