UVIÉU, 04 de Mayu (EUROPA PRESS)
La Xunta pola Defensa de la Llingua Asturiana arrexuntó esta tarde peles cais d'Uviéu a persones, colectivos y asociaciones na so tradicional manifestación a favor de la oficialidá del asturianu, que se celebra cada añu coincidiendo cola conmemoración del 'Día de Les Lletres Asturianes'. Una de les pancartes qu'encabezaba la marcha rezaba por que 'La crisis del capital nun seya cultural'.
Como tolos años, la manifestación yera abierta por Xosé María García, 'Llábana', que ximelgaba la banderona d'Asturies, siguida pola pancarta principal de la manifestación, col lema 'L'asturianu llingua oficial', y el grupu de pandereteres.
Dempués, dexábense ver distintivos y pancartes de les organizaciones que secundaron l'actu, ente les que taben partíos políticos como Izquierda Unida (con presencia del so coordinador xeneral n'Asturies, Jesús Iglesias, y de les diputaes Noemí Martín y Emilia Vázquez) Bloque por Asturies-Unidá Nacionalista Asturiana o Andecha Astur, y sindicatos: FETE-UXT, CC.OO, Suatea y CSI, amás d'organizaciones como Xeira, que trabaya pola defensa del gallego-asturianu na franxa occidental d'Asturies.
La manifestación acabó na Plaza Porlier, onde se lleyó un comunicáu, antes del entamu de la ceremonia solemne del Día de Les Lletres, qu'entama l'Academia de la Llingua Asturiana, y qu'esti añu tien llugar nel Teatru Filarmónica.
