El Principáu convoca la segunda edición del Premiu Nel Amaro de Teatru Profesional n'asturianu

Obra
TEATRO LABORAL - Archivo
Actualizado: lunes, 20 agosto 2018 13:24

UVIÉU, 20 Ago. (EUROPA PRESS) -

El Boletín Oficial del Principáu d'Asturies (BOPA) d'esti llunes publicó la convocatoria de la segunda edición del Premiu Nel Amaro de teatru profesional en llingua asturiana o gallego-asturianu. Esti gallardón quier ayudar a consolidar, arriquecer y prestixar estes dos llingües nel ámbitu del arte dramáticu.

Al premiu pueden presentase obres de compañíes profesionales que fueren yá estrenaes n'asturianu o gallego-asturianu, mesmo orixinales que versiones o adaptaciones de títulos n'otres llingües, que nun resultaren finalistes na anterior edición del premiu.

El plazu pa presentar los proyectos termina'l 10 de setiembre de 2018. A partir d'esa fecha, un xuráu formáu por espertos en teatru y llingua asturiana va escoyer d'ente les propuestes dramátiques presentaes a les cuatro finalistes, que van representar les sos obres nel segundu Festival Nel Amaro de teatru profesional en llingua asturiana, entamáu cola collaboración del Conceyu d'Uviéu a lo llargo de los cuatro primeros vienres del mes de payares nel Teatru Filarmónica d'Uviéu.

Depués de les actuaciones del Festival, el xuráu va decidir cuál ye la compañía o grupu teatral ganador. El premiu va tar dotáu económicamente pela primer vez con seis mil euros, amás va entregase una pieza artística como gallardón, al tiempu que la obra premiada va cuntar col compromisu del Gobiernu del Principáu d'Asturies de velar pola promoción y espardimientu del espectáculu nos medios de comunicación y nos eventos entamaos por el mesmu Gobiernu.

El premiu y festival lleva'l nome de Nel Amaro, autor turonés fináu nel 2011 y qu'a últimos de la década de los setenta del sieglu pasáu abrió'l camín pa la vanguardia teatral n'asturianu. Ente les sos obres de teatru destaquen 'Xénesis o alborá de la concencia' (1978), 'Glayíos nueos, vieya murnia' (1979), 'L'únicu rebalbu' (1980) y 'Antígona, por exemplu', que ganó'l premiu de teatru de l'Academia de la Llingua Asturiana en 1991. 'Les manes en caxón' (2003) foi la so última publicación teatral.

Asturianu ofrecido por