El paru, pal que tovía nun se fixaron servicios mínimos, va entamar a les 00.00 hores del miércoles
UVIÉU, 20 d'Ochobre (EUROPA PRESS)
Los sindicatos UXT y CC.OO caltienen la convocatoria de fuelga de magar el próximu miércoles nos servicios d'Alsa n'Asturies a la que tán llamaos unos 350 trabayadores, tres el conceyu calteníu esta mañana cola compañía, na que nun se llegó a nengún acuerdu. Los sindicatos aseguren que la compañía caltiénse na so postura y niégase a "ceder na so posición" y poro a cumplir lo pautao nel conveniu.
Según esplicaron a Europa Press fontes sindicales existen dellos puntos "insalvables". Asina, UXT y CC.OO reclamaron a la empresa l'abonu de les hores estraordinaries, con preciu avaláu por sentencia, según recordaron, y s'incumple de manera repetida. Amás indicaron qu'en 1994 empresa y trabayadores llegaron a un acuerdu sobre la reconocencia de l'antigúedá, qu'agora la compañía tamién ruempe.
"Nun cumplen tampoco los acuerdos existentes sobre los pases de viaxes pa les families de los trabayadores o sobre los refuerzos", indicaron los sindicatos qu'añadieron que "nun ye comprensible que los viaxeros queden en tierra por falta de vehículos".
Amás, los sindicatos denuncien que la compañía tenga intención de facer una regulación de plantiya cuando s'incumple l'acuerdu sobre los coches alquilaos pa llinies regulares, o que les taquilleres tengan de desarrollar funciones que nun-yos correspuenden, como la recarga de tarxetes de teléfonu.
Pela so parte, la compañía, ante la convocatoria de fuelga, asegura que cumple na so integridá tolos puntos del Conveniu de Tresportes d'Asturies y asegura que los sos emplegaos son los que meyores condiciones tienen de tolos trabayadores del sector de tresporte d'Asturies.
Ante esta postura, los sindicatos indicaron que "si eso fuere cierto la compañía tenía de demostralo".
