UVIÉU, 04 de Febreru (EUROPA PRESS)
Los representantes sindicales d'ArcelorMIttal fueron güei a un nuevu conceyu cola direición pa negociar l'acuerdu marcu, anque pel momentu tovía nun entamaron a discutise los aspeutos nos que más diferencies existen ente dambes partes. Sicasí, nel conceyu celebráu güei, los sindicatos insistieron en que "en mou dalgún van aceptar la conxelación de los salarios nin van renunciar a l'apliación del plan de contratos relevu", dos de les propuestes presentaes pola plataforma y refugaes yá pola compañía.
Según confirmaron fontes a Europa Press nesti cuartu conceyu volvieron a tratase asuntos rellacionaos cola formación y la salú llaboral, "ensin entrar nos temes que realmente van trayer conflictos". Sobre ellos ta previsto entamar a negociar el día 19 d'esti mes.
Pa los sindicatos nun ye normal falar de conxelación salarial cuando la compañía ta a puntu de repartir dividendos "nel momentu más críticu". Nesti sen, insistieron en qu'esos beneficios vienen daos, ente otres coses, pol esfuerzu de tolos trabayadores. De la mesma manera, destacaron que "nun se pue renunciar a l'aplicación de los contratos relevu", porque ye la única forma de caltener y asegurar los puestos de trabayu.
Lo que tamién manifestaron los sindicatos nel so conceyu de güei ye'l treslláu oficial a la compañía del so malestar pola información fecha pública la pasada selmana pola multinacional sobre la posibilidá de parar un fornu altu y presentar un ERE nes instalaciones asturianes.
"Dexámos-yos claro que nun mos prestaron nin les formes nin el fondu, y qu'esa nun ye la manera a la que tamos avezaos a trabayar n'España, onde siempre primó la negociación y el diálogu", destacaron los sindicatos, qu'aseguraron amás que la compañía pidió disculpes pol so proceder.
La pasada selana, coincidiendo col conceyu previstu pa la negociación del conveniu marcu, la multinacional anunció qu'estudiaba aplicar un espediente de regulación d'emplegu (ERE) en toles plantes de productos Planos d'España, y parar ún de los dos fornos altos de Xixón, demientres unos meses, ente'l segundu y el tercer trimestre del añu, ante la crisis qu'afeuta a la compañía.
Los sindicatos van volver mostrar les sos quexes na manifestación de delegaos sindicales prevista pal próximu día 10 en Bruseles, un día enantes de que la multinacional presente los últimos resultaos y reparta los dividendos. "Lo que queremos dexar claro ye qu'esa nun ye la forma d'actuar, polo menos n'España, onde siempre primó la negociación y el diálogu", insistieron los sindicatos.
Pa mañana ta previstu un nuevu conceyu ente dambes partes, direición y sindicatos, pa que los representantes de la multinacional espliquen la situación y les perspectives de la producción de Llargos.
