XIXÓN, 19 de Payares (EUROPA PRESS)
Los trabayadores del astilleru de Naval Xixón volvieron salir güei a la cai en protesta pol Espediente de Regulación d'Emplegu presentáu pola compañía qu'afeuta a la totalidá de la plantiya. Los manifestantes entamaron la so protesta sobre les 10.30 hores de la mañana, tres celebrase una asamblea de trabayadores.
Nesta ocasión, los emplegaos del astilleru xixonés colocaron dos barricaes na avenida de Juan Carlos I, una d'elles en sentíu La Calzada y la otra pa torgar l'accesu al centru la ciudá.
Amás, los manifestantes colocaron una viga de grandes dimensiones en metá de la cai Mariano Pola, cerca a les instalaciones del astilleru, que torga la circulación en dambos sentíos de la vía.
Según informó a Europa Press un representante del comité d'empresa, l'asamblea de trabayadores dio güei'l vistu bonu a les alegaciones presentaes ayeri pol comité sobre l'ERE, nes que s'establez qu'al mesmu falta-y abonda documentación "indispensable" pa la so execución, polo que considera que va tener que paralizase.
La direición del astilleru Naval Xixón presentó'l pasáu 5 de payares un ERE qu'afeuta la totalidá de la plantiya. L'ERE refugólu dafechu'l conxuntu del comité d'empresa que caltién la so intención de torgar la salida del buque que nestos momentos se constrúi nel astilleru.
Según informaron los miembros del comité d'empresa, la direición de Naval Xixón propón la prexubiliación de 53 trabayadores y el despidu coles indemnizaciones según marca la llexislación vixente pal restu de la plantiya, un total de 44 emplegaos.
