Aviso: Esta noticia tiene más de un año. Última actualización: 24/03/2010 14:09
L'Asociación de Trabayadores de Normalización Llingüística alvirtió güei que'l Serviciu de Normalización Llingüística del Conceyu de Piloña zarrará la so actividá'l 31 de marzu pa volver convocar la plaza de la persona responsable, cuando tien yá una sovención concedida pal so funcionamientu. El colectivu pidió que se faiga una simple renovación autonómica del contratu de l'actual encargada, en cuenta de facer otra vuelta la convocatoria, y acusó a la Dirección de Política Llingüística del Principáu de "nun tener un mínimu control y siguimientu" sobre estes situaciones.
Al traviés d'un comunicáu, l'Asociación recordó que ye un problema que ya se dio esti añu nos servicios de Mieres y Llaviana, que pararon la so actividá "unos dos meses". Esplicó que "el Conceyu de Piloña abrió un Serviciu de Normalización (SNL) con una duración de cuatro meses de contratación". "Agora que'l contratu de la técnica en normalización ta p'acabar, nun entendemos cómo nun se fai una renovación automática teniendo en cuenta que yá tienen una sovención aprobada y concedida de la Conseyería de Cultura pal so funcionamientu", esplica la nota, pa matizar que "lo que ta faciendo'l Conceyu Piloña ye volver convocar una plaza col mesmu perfil que la que convocó hai cinco meses, paralizando asina'l funcionamientu d'esti Serviciu".
Según esplicó'l comunicáu "tando abiertu'l plazu pa solicitar proyectos de normalización llingüística hasta'l 19 d'abril, el SNL queda sin personal dende'l 31 de marzu. Por mui rápido que se faigan les coses nun se podrá contratar a otra persona hasta últimos d'abril -siendo mui optimistes-, colos problemes qu'ello pue traer na solicitú de proyectos", señaló.
L'Asociación diz nun entender "cómo ye posible que dende la Dirección Xeneral de Política Llingüística nun tengan un mínimu de control y seguimientu de los SNL, y nun se pida seriedá y continuidá nes contrataciones de los Conceyos". Pidió, poro "a la Dirección Xeneral que dexe de ser una simple coordinadora económica y asuma la so responsabilidá na normalización del idioma".
El colectivu entrúgase tamién "si los Conceyos realmente tienen interés en normalizar y dignificar la llingua asturiana o namás tienen interés en recibir la sovención que da'l Principáu pa estos servicios, situación que se fomenta dende la Dirección Xeneral de Política Llingüística, al nun poner nenguna condición de trabayu nin dar nengún tipu d'orientación sobre qué supón tener un SNL nun Conceyu".
Comenta amás que "ye curioso, amás, que na convocatoria de la plaza nun cumplen nin siquier el decretu oficial de toponimia del conceyu de Piloña".
L'Asociación denunció públicamente una vez más "la precariedá y inestabilidá de los Servicios de Normalización nos Conceyos", problemes de los que responsabilizó lo mesmo a la Conseyería de Cultural qu'a los Ayuntamientos.